انڈیانا میں تفتیش کاروں نے ایک صفائی کرنے والی خاتون کے قتل کی ابتدائی تحقیقات مکمل کر لی ہیں، جو غلط پتے پر غلطی سے پہنچ گئی تھی اور گھر کے مالک نے دروازے کے پار سے اسے اس خوف میں گولی مار دی کہ باہر کوئی گھسنے والا موجود ہے۔
وائٹس ٹاؤن میٹروپولیٹن پولیس ڈیپارٹمنٹ کے نتائج باضابطہ طور پر بون کاؤنٹی کے پراسیکیوٹر کے دفتر کو جمع کرا دیے گئے ہیں تاکہ یہ طے کیا جا سکے کہ بدھ کے روز ہونے والی اس ہلاکت کے سلسلے میں کوئی مجرمانہ الزام عائد کیا جائے یا نہیں۔
پراسیکیوٹر کینٹ ایسٹ وُڈ نے مقامی میڈیا کو بتایا کہ یہ کیس اس لیے پیچیدہ ہے کیونکہ انڈیانا کے "اسٹینڈ یور گراؤنڈ لا” (اپنے دفاع کے حق کا قانون) کی "کاسل ڈاکٹرائن” شق افراد کو اپنے گھر میں گھسنے والے سے اپنی جان بچانے کے لیے مہلک طاقت استعمال کرنے کا حق دیتی ہے۔
پولیس کے مطابق ہلاک ہونے والی صفائی کرنے والی خاتون کی شناخت 32 سالہ ماریا فلورندا ریوس پیریز ڈی ویلازکیز کے نام سے ہوئی، جو انڈیاناپولس کی رہائشی اور میڈیا رپورٹس کے مطابق گواتیمالا سے آئی ہوئی تارکِ وطن اور چار بچوں کی ماں تھی۔
پولیس ترجمان کیپٹن جان جُرخاش کے مطابق جب ریوس پیریز اور ان کے شوہر علی الصبح گھر کے قریب پہنچے تو گھر کے دو رہائشیوں میں سے ایک نے دروازے کے دوسری طرف سے گولی چلائی، جو خاتون کے سر پر لگی۔
اس وقت گھر کے رہائشی پہلے ہی 911 پر کال کر چکے تھے کہ شاید کوئی چوری یا گھس بیٹھ کی کوشش ہو رہی ہے۔
پولیس کے مطابق جائے وقوعہ پر پہنچنے والے افسران نے ریوس پیریز کو مردہ حالت میں پایا اور بعد میں تعین ہوا کہ وہ اور ان کے شوہر ایک صفائی کرنے والی ٹیم کے رکن تھے جو غلط پتے پر پہنچ گئے تھے۔پولیس کے بیان کے مطابق کسی زبردستی داخلے یا توڑ پھوڑ کے شواہد نہیں ملے۔
انڈیاناپولس اسٹار کے مطابق مقتولہ کے شوہر موریسیو ویلازکیز نے ایک آن لائن خبر رساں ادارے کو بتایا کہ وہ دونوں سمجھ رہے تھے کہ وہ درست پتے پر پہنچے ہیں اور گھر کے قریب جانے سے پہلے انہوں نے دو بار مقام کی تصدیق بھی کی۔
اسٹار کے مطابق ویلازکیز نے بتایا کہ وہ دونوں گھر کی برآمدے میں کھڑے ہو کر چابی تلاش کر رہے تھے کہ اچانک فائرنگ ہو گئی۔
پولیس نے گھر کے رہائشیوں کی شناخت ظاہر نہیں کی اور نہ ہی یہ بتایا کہ گولی کس نے چلائی، کیونکہ تفتیش "پیچیدہ، نازک اور جاری” ہے۔
یہ واقعہ اُن دیگر واقعات سے مشابہ ہے جو حالیہ برسوں میں پیش آ چکے ہیں، جن میں گھروں کے مالکان نے غلط پتے پر آنے والے افراد کو گھسنے والا سمجھ کر فائرنگ کر دی تھی۔
وائٹس ٹاؤن کیس کا جائزہ لینے والے کاؤنٹی پراسیکیوٹر کو انڈیانا کے اس قانون کو مدنظر رکھنا ہوگا، جو شہریوں کو اپنے گھر میں اگر وہ کسی شخص کو حقیقی خطرہ سمجھیں تو اپنے دفاع میں مہلک طاقت استعمال کرنے کی اجازت دیتا ہے۔
