ایک بچپن کا خواب، جو والد کے کلینک میں شروع ہوا تھا، اب ایک انقلابی کامیابی میں بدل گیا ہے — ڈاکٹر نوف حسن المعینی نے تاریخ رقم کر دی ہے کیونکہ وہ پہلی اماراتی خاتونِ ہمت بن گئی ہیں جنہوں نے میڈیکل ڈاکٹر کا اعزاز حاصل کیا۔
ان کا سفر اُن کے والد، جو ایک نرس تھے، سے گہرے طور پر متاثر تھا۔ وہ اسکول کے بعد والد کو مریضوں کی دیکھ بھال کرتے ہوئے دیکھا کرتی تھیں۔
ڈاکٹر نوف کا خلیج ٹائمز سے بات کرتے ہوئے کہنا تھا کہ “میں ایک سادہ اماراتی لڑکی کے طور پر پلی بڑھی، ایک ایسے خاندان میں جو تعلیم اور انسانیت سے محبت کرتا ہے۔ میں بچپن میں اسکول کے بعد اپنے والد کے ساتھ کلینک جاتی تھی اور اُنہیں مریضوں کے بلڈ پریشر وغیرہ چیک کرتے ہوئے دیکھتی تھی۔ میرا ڈاکٹر بننے کا خواب وہیں سے شروع ہوا۔”
انہوں نے بتایا:“میں نے طب کو اس لیے پسند کیا کیونکہ میرے والد نرس تھے۔ میں نے ریڈیالوجی کو اپنا شعبہ اس وقت چُنا جب انٹرن شپ کے دوران ایمرجنسی ڈیپارٹمنٹ میں ایک پیچیدہ کیس حل کیا۔”
اس کیس میں مریض کے سینے کے ایک ایکس رے سے انہوں نے یہ تشخیص کی کہ مریض کے دائیں طرف کے اعضا پھیپھڑوں کی جگہ میں منتقل ہو گئے تھے۔ ریڈیالوجی کی وسعت اور اسپتالوں میں اس کے مرکزی کردار نے انہیں اس شعبے کے انتخاب پر قائل کر دیا۔
ڈاکٹر نوف کے سفر میں کئی کٹھن مراحل آئے۔ اچانک ان میں ایک نایاب اور غیر معروف بیماری کی تشخیص ہوئی، جو بظاہر گٹھیا (rheumatism) کی ایک نایاب قسم تھی۔
متعدد اسپتالوں میں ٹیسٹ اور بیرونِ ملک علاج کے باوجود ان کی حالت بگڑتی گئی، یہاں تک کہ گینگرین کے باعث ان کی ایک ٹانگ اور ہاتھ کی کچھ انگلیاں کاٹنا پڑیں تاکہ مرض مزید نہ پھیل جائے۔ٹانگ کھونے کے بعد جب وہ میڈیکل تعلیم جاری رکھنا چاہتی تھیں تو انہیں انکار کا سامنا کرنا پڑا۔
“میں نے اپنے حق کے لیے کھڑے ہو کر تعلیم جاری رکھنے کا مطالبہ کیا۔ اُس وقت زیادہ آگاہی نہیں تھی، مگر مجھے کمیٹی کو قائل کرنے اور فائنل امتحان دینے کا موقع ملا۔ میں کامیابی سے گریجویٹ ہوئی۔
ان کا کہنا تھا کہ “ان مشکلات پر قابو پانا صرف میرے بس کی بات نہیں تھی۔ اگر اللہ پر پختہ ایمان، دوستوں اور خاندان کی حمایت، اور میرے ملک کی قیادت کا تعاون نہ ہوتا تو یہ ممکن نہیں تھا۔
ڈاکٹر نے بتایا کہ “میری جسمانی معذوری ہی میری سب سے بڑی محرک بنی۔ میں جب تک سانس لے رہی ہوں، میں کچھ بھی کر سکتی ہوں۔ زندہ رہنے کا مطلب ہے کہ خواب دیکھنا اور جینا چاہیے۔ سب کچھ ممکن ہے۔”
“میں اپنے مریضوں کے احساسات بہتر سمجھ سکتی ہوں کیونکہ میں خود بھی ان جیسی حالت میں رہی ہوں۔ ایک اچھا لفظ بھی شفا دے سکتا ہے۔
آج ڈاکٹر نوف المعینی سیہا (SEHA) میں ریڈیالوجی ڈیپارٹمنٹ کی بزنس آپریشن منیجر کے طور پر خدمات انجام دے رہی ہیں — ایک ایسا عہدہ جو ان کے طبی علم اور انتظامی صلاحیتوں کا امتزاج ہے۔
وہ اپنی سی ای او ڈاکٹر یاسمین مہر سے متاثر ہیں:
“ڈاکٹر یاسمین مہر ریڈیالوجی کی سی ای او ہیں۔ انہیں دیکھ کر میں نے سیکھا کہ کس طرح طبی علم اور قیادت کے امتزاج سے مریضوں کی حفاظت اور صحت کے نظام کو بہتر بنایا جا سکتا ہے۔ اس نے مجھے بھی قیادت کی تعلیم حاصل کرنے کی ترغیب دی۔”
ان کے نزدیک پیشہ ورانہ کامیابی عہدوں سے نہیں بلکہ روزمرہ اثر سے ماپی جاتی ہے۔ انہوں نے بتایا کہ جب میں اپنے مریضوں کی مدد کرتی ہوں اور ان کے اسپتال کے تجربے کو محفوظ اور آسان بناتی ہوں، تو میرے لیے وہی سب سے بڑی کامیابی ہے۔”
ڈاکٹر نوف "لوگوں کے عزم” (People of Determination) کی سرگرم وکیل ہیں۔ انہوں نے بتایا کہ یو اے ای میں مثبت تبدیلی آ رہی ہے۔“اب معذور افراد کے حقوق اور کام کی جگہوں پر ان کے لیے سہولیات کے حوالے سے آگاہی بڑھ رہی ہے۔”
آگے بڑھتے ہوئے ان کی خواہش ہے کہ وہ ایک ایسی اماراتی رہنما بنیں جو دنیا بھر میں اپنے ملک کی نمائندگی کرے اور مثبت تبدیلی کی علامت بنے۔
انہوں نے اپنے پیغام میں کہا کہ اپنی معذوری کے باوجود اپنے خوابوں کی پیروی کریں۔ ہمیشہ اپنی صلاحیتوں پر یقین رکھیں اور اپنے اہداف تک پہنچنے کی کوشش جاری رکھیں، جب تک کہ آپ خود کوئی دوسرا راستہ نہ چُنیں۔ جو چاہیں وہ کریں، اور اپنے سفر کا لطف اٹھائیں۔”
