نئی دہلی: ایئر انڈیا کا بوئنگ 777 طیارہ پیر کی صبح ٹیک آف کے فوراً بعد ایک انجن (دائیں جانب) بند ہونے پر بحفاظت دہلی واپس آ گیا۔ چونکہ دو انجن والے طیارے ایک انجن کے ساتھ بھی محفوظ طریقے سے لینڈ کر سکتے ہیں، اس لیے طیارہ VT-ALS واپس دہلی لوٹ آیا۔ پرواز AI 887 صبح 6 بج کر 10 منٹ پر ممبئی کے لیے روانہ ہوئی تھی اور فلائٹ ٹریکنگ ویب سائٹس کے مطابق تقریباً 6 بج کر 52 منٹ پر واپس آ گئی۔
انجن میں خرابی کی تحقیقات کے ساتھ ساتھ ڈائریکٹوریٹ جنرل آف سول ایوی ایشن (ڈی جی سی اے) نے اس بات کی بھی نگرانی کی کہ اس ایئر ٹرن بیک کے بعد مسافروں کو کم سے کم تکلیف ہو۔ ایئر انڈیا نے مسافروں کو ان کی منزل تک پہنچانے کے لیے ایک اور بوئنگ 777 طیارے (VT-ALP) کا انتظام کیا۔ بورڈنگ گیٹ پر مسافروں کو ریفریشمنٹ بھی فراہم کی گئی۔
ایئر انڈیا ترجمان کے مطابق22 دسمبر کو دہلی سے ممبئی جانے والی پرواز AI 887 کے عملے نے معیاری آپریٹنگ طریقۂ کار کے تحت ٹیک آف کے کچھ ہی دیر بعد ایک تکنیکی مسئلے کے باعث دہلی واپس آنے کا فیصلہ کیا۔ طیارہ بحفاظت دہلی لینڈ کر گیا اور مسافروں اور عملے کو اتار لیا گیا ہے۔ ایئر انڈیا اس غیر متوقع صورتحال کے باعث ہونے والی تکلیف پر دلی افسوس کا اظہار کرتی ہے۔ طیارے کے ضروری معائنے کیے جا رہے ہیں۔
دہلی میں ہماری گراؤنڈ ٹیم مسافروں کو فوری مدد فراہم کر رہی ہے اور انہیں جلد ان کی منزل تک پہنچانے کے لیے متبادل انتظامات کر دیے گئے ہیں۔ ایئر انڈیا میں مسافروں اور عملے کی حفاظت اور فلاح و بہبود ہماری اولین ترجیح ہے۔”
