کورونا وائرس: اسپین میں ایک لاکھ جانوروں کے قتل عام کی تیاریاں

اسپین میں ایک فارم میں کورونا وائرس کی وبا پھیلنے کے بعد ہسپانوی حکام نے تقریباً ایک لاکھ مکنس ( آبی نیولے) ختم کرنے کا حکم دے دیا ہے۔ یہ جانور فارم پر فر یا کھال لینے کے لیے پالا جاتا ہے لیکن کورونا وبا پھیلنے کی وجہ سے اسے بند کیا جا رہا ہے اور احتیاطی تدابیر کے طور پر ان جانوروں کو مار دیا جائے گا۔

محکمہ زراعت، لائیو سٹاک اور ماحولیات نے جمعہ کے روز اپنے ایک بیان میں بتایا ہے کہ اس فارم پر کام کرنے والے افراد میں سے 7 کے کورونا ٹیسٹ مثبت آنے کے بعد 92 ہزار 700 منک جانوروں کو ذبح کرنے کا حکم دیا گیا ہے۔ فارم پر متعدد جانور بھی کورونا وائرس کا شکار ہوئے ہیں۔

احتیاطی تدابیر اور اقدامات کرتے ہوئے فارم کو بند کر دیا گیا ہے۔ حال ہی میں 7 جولائی کو کئے جانے والی ٹیسٹنگ کے دوران 90 میں سے 78 جانوروں کے کورونا ٹیسٹ مثبت آئے۔

حکام کا کہنا ہے کہ یہ نتیجہ اخذ کرنا مشکل ہے کہ آیا یہ انفیکشن جانوروں سے انسانوں میں منتقل ہوا یا انسانوں سے جانوروں میں۔۔ اور مزید یہ کہ ان جانوروں کے رویوں میں کوئی غیر معمولی تبدیلی واقع نہیں ہوئی اور جانوروں کی اموات کی شرح بھی بہت کم تھی۔ تاہم احتیاطی تدابیر کے طور پر فارم میں تمام آبی نیولوں کو ختم کر دیا جائے گا۔