بھارت سے تعلق رکھنے والا نوجوان لندن میں ہونے والی مینٹل کیلکولیشن ورلڈ چیمپئن شپ کا مقابلہ جیت کر دنیا کے تیز ترین انسانی کیلکولیٹر بن گیا ہے۔
کورونا وبا کے باعث اس برس کی ورلڈ چیمپئن شپ ورچوئل طریقے سے منعقد ہوئی جس میں دنیا بھر سے 13 سے 50 برس کے 31 افراد نے حصہ لیا، دیگر شرکاء کا تعلق برطانیہ، جرمنی، فرانس، متحدہ عرب امارات، یونان اور لبنان سے تھا۔
بھانو پرکاش نامی یہ 20 سالہ نوجوان بھارتی ریاست حیدرآباد سے تعلق رکھتا ہے، اس نے 5 برس کی عمر میں ایس آئی پی اباکس پروگرام میں داخلہ لیا تھا اور 2013 میں صرف 13 برس کی عمر میں عالمی اباکس چیمپئن شپ جیت لی۔
بھانو کو 5 برس کی عمر میں ایک حادثے میں سر پر شدید چوٹیں آئیں اور وہ ایک برس بستر تک محدود ہو کر رہ گئے، یہیں سے میتھ کے متعلق ان کے حیرت انگیز سفر کا آغاز ہوا۔
انہوں نے بی بی سی سے گفتگو کرتے ہوئے بتایا کہ ڈاکٹروں نے اس خدشے کا اظہار کیا تھا کہ چوٹ کی وجہ سے ان کی علم حاصل کرنے کی صلاحیتیں متاثر ہو سکتی ہیں، چنانچہ انہوں نے اپنی صلاحیتوں کو بہتر بنانے اور ذہن کو مصروف رکھنے کے لیے ریاضی کا سہارا لیا۔
ان کی میتھ کی ڈگری مکمل ہونے کے قریب ہے تاہم وہ خود کو واحد اسی شعبے پر محدود رکھنے کے بجائے کوئی اچھی نوکری یا بہتر کاروبار کرنا چاہتے ہیں۔
ان کا کہنا ہے کہ وہ اسکول سے واپس آنے کے بعد روزانہ 6 سے 7 گھنٹے میتھ کی پریکٹس کیا کرتے تھے، اس محنت کے باعث ان کا ذہن تیز رفتار کیلکولیشن کا عادی ہوتا گیا۔
بھانو نے کہا کہ دنیا کے کئی ممالک ریاضی کو سائنس کی کیٹگری میں نہیں گنتے بلکہ اسے ایک آرٹ سمجھتے ہیں، وہ خود بھی اس بارے میں یہی تصور رکھتے ہیں۔
ان کا کہنا ہے کہ وہ ریاضی دانوں کی ایک کمیونٹی بنانا چاہتے ہیں، انہوں نے ایک ادارہ بھی قائم کیا ہوا ہے جس کے ذریعے حیدرآباد ریاست کے بچوں کو ریاضی کی طرف رغبت دلائی جاتی ہے۔
وہ بچوں کے اندر ریاضی کی تیز رفتار صلاحیتوں کی نشوونما کے لیے مختلف پروگرامز چلا رہے ہیں جن میں ‘میتھ وزرڈ’ اور ‘اپنے اندر کے کمپیوٹر کو آن کرو’ جیسے منفرد پروگرامز شامل ہیں۔
وہ تلنگانہ کی حکومت کے ساتھ مل کر کام بھی کرتے ہیں، انہوں نے چھٹی سے دسویں کلاس کے بچوں کے لیے 700 گھنٹوں پر مشتمل ریاضی کا مواد تیار کر کے دیا ہے۔
ان کا کہنا ہے کہ وہ نوجوانوں میں ریاضی کا خوف ختم کرنا چاہتے ہیں اور ان کے اندر انسانی ذہن کی لامحدود صلاحیتوں کے متعلق آگہی پھیلانا چاہتے ہیں۔
