خیبرپختونخوا میں 15 ستمبر سے اسکول کھولنے کا اعلان کر دیا گیا ہے۔
یہ اعلان صوبائی ڈائرکٹریٹ برائے ابتدائی و ثانوی تعلیم نے اعلامیے کے ذریعے کیا جس میں مختلف ایس او پیز کا بھی بتایا گیا ہے۔
ایس او پیز میں اسکولوں میں ہاتھ دھونے کے لیے صابن کی فراہمی لازمی قرار دے دی گئی ہے، اسی طرح اسکولوں میں جراثیم کش مواد کی موجودگی بھی یقینی بنانے کا کہا گیا ہے۔
صوبائی ڈائرکٹریٹ برائے ابتدائی و ثانوی تعلیم کے مطابق وفاقی حکومت کے فیصلے کے تحت اسکول کھولنے کا فیصلہ کیا گیا ہے۔
اسکولوں کے عملے کو ایس او پیز کے حوالے سے مکمل تربیت دے دی گئی ہے، طلبہ و اساتذہ کے لیے ماسک اور سینیٹائزر کا استعمال لازمی ہو گا۔
اس سے قبل وفاقی وزیر تعلیم شفقت محمود نے بتایا تھا کہ 15 ستمبر سے تعلیمی ادارے کھولنے کا فیصلہ کیا گیا ہے تاہم 7 ستمبر کو ملک میں کورونا کی صورتحال دیکھ کر حتمی فیصلہ کیا جائے گا۔
پنجاب میں اسکولوں کے لیے ایس او پیز
صوبائی وزیر اسکول ایجوکیشن ڈاکٹر مراد راس کا کہنا ہے کہ اسکول کھلنے پر کلاس کے تمام بچے بیک وقت نہیں آئیں گے بلکہ یا تو کلاسوں میں ڈبل شفٹ ہو گی یا پھر آدھے طلبہ ایک روز اور باقی دوسرے روز آئیں گے۔
ان کا کہنا تھا کہ طلبہ گھر سے ماسک پہن کر اسکول آئیں گے، اساتذہ کے لیے کورونا ٹیسٹ لازمی ہو گا، انہیں 3 روز قبل کا کورونا ٹیسٹ دکھانا ہو گا۔
