کراچی میں بارشوں کا 53 سالہ پرانا ریکارڈ ٹوٹ گیا ہے، جولائی 1967 میں کراچی میں 429 ملی میٹر بارش ہوئی تھی جبکہ رواں ماہ اب تک 442 ملی میٹر بارش ہو چکی ہے۔
جمعرات کی صبح شروع ہونے والا بارشوں کا سلسلہ تمام روز جاری رہا جس کے بعد شہر کے ساتوں انڈرپاس پانی سے بھر گئے جنہیں ٹریفک کے لیے بند کر دیا گیا ہے۔
کراچی کے شہری بری طرح بارش سے متاثر ہوئے ہیں، اہم شاہراہوں پر پانی جمع ہے جس سے ٹریفک کی روانی شدید متاثر ہوئی ہے۔
شہر میں بارشوں کے باعث مختلف واقعات میں 12 افراد جاں بحق ہو گئے ہیں، بارش کا پانی اسقدر تیز تھا کہ ایم اے جناح روڈ پر سیکیورٹی کے لیے رکھے گئے کنٹینرز بھی بہہ گئے جبکہ شارع فیصل کے قریب یونیورسٹی کی بس پانی میں پھنس گئی اور مسافر کود کر کنارے تک پہنچے۔
محکمہ موسمیات کا کہنا ہے کہ بحیرہ عرب میں بارشوں کا سسٹم کمزور پڑ رہا تھا مگر بلوچستان سے آنے والے سسٹم نے اسے پھر سے مضبوط کر دیا ہے جس کی وجہ سے رات 11 بجے تک بارش کا سلسلہ جاری رہ سکتا ہے جبکہ کل ہلکی بوندا باندی کا امکان ہے۔
محکمہ موسمیات کے ڈائرکٹر سردار سرفراز کے مطابق 10 محرم کو کراچی میں معتدل بارش کا امکان ہے۔
