وزیراعظم عمران خان کی سربراہی میں ہونے والے کابینہ اجلاس میں دہری شہریت رکھنے والے افراد کو انتخابات میں حصہ لینے کا حق دینے کے لیے آئینی بل کی منظوری دے دی گئی۔
اجلاس میں سینیٹ میں خفیہ رائے شماری کے خاتمے کے بل کی بھی منظوری دی گئی، اس قانون کی منظوری سے ایوان بالا میں انتخابات کے دوران پیدا ہونے والے کئی مسائل حل ہو جائیں گے۔
اسی طرح وفاقی کابینہ نے پشاور، لاہور اور راولپنڈی میں اسپیشل کورٹ کے ججز کی تعیناتیوں اور جدید جیل کی تعمیر کے لیے اسلام آباد ماسٹر پلان میں ترمیم کی منظوری دے دی۔
اجلاس میں 16 نکاتی ایجنڈے پر غور کیا گیا اور چین اور پاکستان کے درمیان وزارت ٹیلی کمیونیکیشن کے حوالے مفاہمت کی یادداشت کی منظوری بھی دی گئی۔
اسی طرح وفاقی کابینہ کو پائلٹس کے مشکوک لائسنسز کی منسوخی کے متعلق تفصیلی بریفنگ دی گئی۔
