راولپنڈی: قومی احتساب بیورو (نیب) نے مسلم لیگ ن کے سینئر رہنما اور سابق وزیراعظم شاہد خاقان عباسی کو کل طلب کر لیا ہے۔
ذرائع کے مطابق انہیں ایم ڈی منرل ڈویلپمنٹ کارپوریشن تعیناتی کیس میں طلب کیا گیا ہے۔ انہیں تعیناتی کا تمام ریکارڈ بھی ساتھ لانے کی تلقین کی گئی ہے۔
ذرائع کا کہنا ہے کہ کل اس کیس میں ان کا باقاعدہ طور پر بیان ریکارڈ کیا جائے گا۔
یاد رہے کہ 18 جولائی 2019 میں شاہد خاقان عباسی کو نیب نے گرفتار کیا تھا، ان پر الزام تھا کہ بطور وزیر پیٹرولیم انہوں نے ایک ایل این جی ٹرمینل کا ٹھیکہ اپنی من پسند کمپنی کو دیا تھا۔
بعد ازاں انہیں 26 فروری 2020 کو ضمانت ملنے کے بعد رہا کر دیا گیا تھا۔
اسلام آباد ہائی کورٹ کے چیف جسٹس اطہر من اللہ اور جسٹس لبنیٰ سلیم پرویز پر مشتمل بینچ نے شاہد خاقان عباسی ایک کروڑ روپے کے ضمانتی مچلکوں کے عوض ان کی ضمانت منظور کی تھی۔
گزشتہ روز انہوں نے ہم نیوز سے بات کرتے ہوئے اس بات کا خدشہ ظاہر کیا تھا کہ انہیں نیب نے اختیارات کے غلط استعمال پر نوٹس بھیجا ہے۔ شہبازشریف کی گرفتاری کے بعد شاید انہیں بھی حراست میں لے لیا جائے گا۔
انہوں نے کہا تھا کہ شہباز شریف کی گرفتاری پر ہمارا رد عمل آئے گا، ہمیں استعفوں کے ذریعے قربانی دینی ہوگی۔
