لاہور: احتساب عدالت نے منی لانڈرنگ اور اثاثہ جات کیس میں شہبازشریف کی اہلیہ نصرت شہباز اور بیٹی رابعہ عمران کے ناقابل ضمانت وارنٹ گرفتاری جاری کر دیے ہیں۔
عدالت نے نصرت شہباز اور رابعہ عمران کے عدالت میں پیش نہ ہونے پر یہ وارنٹ جاری کیے ہیں اور نیب کو دونوں خواتین کو گرفتار کر کے عدالت میں پیش کرنے کا حکم جاری کیا ہے۔
احتساب عدالت نے شہبازشریف کی اہلیہ، بیٹی اور داماد کے وارنٹ گرفتاری جاری کر دیے
عدالت نے شہباز شریف کی بیٹی جویریہ علی کی مستقل حاضری سے استثنیٰ کی درخواست بھی منظور کر لی۔
سماعت کے دوران سلمان شہباز اور ہارون یوسف کے متعلق کوئی رپورٹ پیش نہ کرنے پر عدالت نے دفتر خارجہ کے ذمہ دار افسر کو ریکارڈ سمیت طلب کر لیا ہے۔
اس سے قبل احتساب عدالت نے ننی لانڈرنگ اور آمدنی سے زائد اثاثہ جات کیس میں شہبازشریف کی اہلیہ، بیٹی اور داماد کے وارنٹ گرفتاری جاری کیے تھے۔
عدالت نے نصرت شہباز اور رابعہ عمران کے قابل ضمانت جبکہ شہبازشریف کے داماد ہارون یوسف کے ناقابل ضمانت وارنٹ گرفتاری جاری کیے تھے۔
عدالت نے ہارون یوسف کو گرفتار کر کے پیش کرنے کا حکم بھی دیا تھا اور سلمان شہباز کے ناقابل وارنٹ گرفتاری برقرار رکھتے ہوئے دفتر خارجہ کو ان پر عمل درآمد کرنے کا حکم بھی جاری کیا تھا۔
عدالت نے آئندہ سماعت پر نصرت شہباز اور رابعہ عمران کو دوبارہ پیش ہونے کا حکم دیا تھا۔ عدالت نے شہبازشریف کی بیٹی جویریہ شہباز اور حمزہ شہباز کی حاضری سےاستثنی کی درخواست منظورکرلی تھی۔
