30 ستمبر سے پاکستان بھر میں پرائمری اسکول کھولنے کا اعلان

وفاقی وزیر تعلیم شفقت محمود نے 30 ستمبر سے ملک بھر میں پرائمری اسکول کھولنے کا اعلان کردیا ہے۔

یہ اعلان انہوں نے نیشنل کمانڈ اینڈ آپریشن سنٹر (این سی او سی) کے اجلاس کے بعد پریس کانفرنس میں کیا ہے، وزیراعظم کے معاون خصوصی برائے صحت ڈاکٹر فیصل سلطان بھی ان کے ہمراہ تھے۔

انہوں نے کہا کہ طلبہ کے مستقبل کو مد نظر رکھتے ہوئے یہ فیصلہ کیا گیا ہے۔ اس حوالے سے صوبوں سے بھی مشاورت کی گئی ہے۔

وفاقی وزیر نے کہا کہ والدین کو یقین دہانی کراتے ہیں کہ اسکولوں میں ایس او پیز پر سختی سے عمل درآمد کرایا جائے گا۔

ان کا کہنا تھا کہ ایس او پیز کی خلاف ورزی کرنے والے اسکولوں کو بند کر دیا گیا ہے۔

انہوں نے کہا کہ یہ بہت اہم فیصلہ ہے کیونکہ تقریباً 3 کروڑ بچے پرائمری تعلیم حاصل کرتے ہیں اس لیے اس معاملے پر بہت سوچ بچار کی گئی ہے اور اس کے بعد یہ فیصلہ کیا گیا ہے۔

پنجاب کے وزیرتعلیم مراد راس نے کہا ہے کہ کل بدھ سے پورے صوبے میں سرکاری اور نجی پرائمری سکول کھل جائیں گے۔

اپنے ایک ٹویٹ میں ان کا کہنا تھا کہ سکول واپس آنے والوں میں پرائمری کلاسوں کے طلبا کی تعداد سب سے زیادہ ہے۔ ایس اوپیز کے معاملے پر کسی قسم کی غفلت برداشت نہیں کی جائے گی۔

اسی طرح خیبرپختونخوا کے وزیرتعلیم شہرام ترکئی نے بھی کل سے صوبے بھر کے پرائمری اسکول کھولنے کا اعلان کیا ہے اور والدین سے اپیل کی ہے کہ وہ ایس او پیز پر عملدرآمد کے لیے تعاون کریں۔