اسلام آباد: نیشنل کمانڈ اینڈ آپریشن سینٹر (این سی او سی) کے اجلاس میں کراچی میں کورونا کے بڑھتے ہوئے کیسز پر تشویش کا اظہار کیا گیا ہے۔
اجلاس میں بتایا گیا کہ پاکستان میں رپورٹ ہونے والے آدھے کیسز صرف کراچی سے آ رہے ہیں۔
این سی او اسی کے مطابق پاکستان میں گزشتہ 24 گھنٹے کے دوران کورونا کے 747 کیسز سامنے آئے جن میں سے 365 کا تعلق کراچی سے تھا۔
وزیراعظم کے معاون خصوصی برائے صحت فیصل سلطان نے کراچی میں سمارٹ لاک ڈاؤن لگانے کی تجویز پیش کی اور کہا کہ اسمارٹ لاک ڈاوَن، کنٹیکٹ ٹریسنگ اور ایس او پیز پر عمل ضروری ہے۔
سیکرٹری سندھ نے این سی او اسی کو بریفنگ دیتے ہوئے بتایا کہ کراچی میں کورونا کے کیسز بڑھ رہے ہیں، شہری حکومت صورتحال کی نگرانی کر رہی ہے۔
ڈاکٹر فیصل سلطان نے کہا کہ کورونا متاثرین تک رسائی اور ہیلتھ پروٹوکول پر عمل درآمد انتہائی ضروری ہے۔
این سی او سی کے مطابق ملک بھر میں کورونا کے مجموعی کیسز کی تعداد 3 لاکھ 12 ہزار 263 ہوگئی، گزشتہ 24 گھنٹے کے دوران کورونا سے 5 افراد جاں بحق ہوئے ہیں۔
پاکستان میں اب تک کورونا سے جاں بحق افراد کی تعداد 6 ہزار479 ہو گئی، ملک بھر میں کورونا کے فعال کیسز کی تعداد 8 ہزار 903 ہے۔
یاد رہے کہ پاکستان میں کورونا کے فعال کیسز 6 ہزار سے بھی نیچے آ گئے تھے تاہم کچھ عرصے سے یہ تعداد مسلسل بڑھ رہی ہے۔
وزیراعظم عمران خان بھی کورونا کی دوسری لہر سے خبردار کر چکے ہیں جبکہ عالمی ادارہ صحت نے بھی اس حوالے سے خدشات کا اظہار کیا ہے۔
