صوبہ خیبرپختونخوا کے اسکولز میں کورونا وائرس پھیلنے کے خدشے کے پیش نظر صبح اسمبلی کرنے پر پابندی عائد کر دی گئی ہے۔
اس ضمن میں محکمہ تعلیم نے اعلامیہ جاری کر دیا ہے جس کے مطابق صوبے کے تمام اسکولز میں بریک بھی ختم کرنے کا فیصلہ کیا گیا ہے۔
اس کے علاوہ خیبرپختونخوا کے اسکولوں کے اوقات میں بھی تبدیلی کردی گئی ہے۔ ہائی اسکول کی چھٹی ایک بجکر 30 پر جب کہ پرائمری اسکولز کے اوقات کار صبح 8 بجکر 30 منٹ سے لیکر 12 بج کر 30 منٹ ہو گی۔
محکمہ تعلیم کی جانب سے اسکولوں میں ایس او پیز پر سخت عمل درآمد کی ہدایت کی گئی ہے۔
خیال رہے کہ ملک بھر کورونا وائرس کی دوسری لہر کا خدشہ پیدا ہو گیا ہے اور کئی اسکولوں، جامعات اور کالجز کو کورونا کیسز سامنے آنے کے بعد بند کر دیا گیا ہے۔
گزشتہ روز کورونا کیسز سامنے آنے کے بعد پشاور کے خیبرمیڈیکل کالج کو 2 ہفتوں کے لیے بند کر دیا گیا تھا۔
کالج انتظامیہ کا کہنا ہے کہ محکمہ صحت کی ہدایت پر عمل کرتے ہوئے کالج بند کرنے کا فیصلہ کیا گیا ہے تاکہ دیگر طلبہ میں وائرس پھیلنے کو روکا جا سکے۔
اس سے قبل خیبر میڈیکل کالج پشاور کے گرلز ہاسٹل میں 4 طالبات میں کورونا وائرس کی تصدیق ہوئی تھی جس کے بعد ہاسٹل بند کردیا گیا تھا۔
کالج کے ترجمان کے مطابق میڈیکل کالج کی طالبات کو قرنطینہ کردیا گیا ہے جبکہ گرلز ہاسٹل کو 2 ہفتوں کے لیے بند کردیا گیا۔
ان کا کہنا تھا کہ ہاسٹل میں رہائش پذیر تمام طالب علموں کا اسکریننگ ٹیسٹ کرانے کا فیصلہ بھی کیا گیا ہے۔
پاکستان میں کورونا کیسز میں ایک مرتبہ پھر سے اضافہ ہو رہا ہے جس کے بعد ملک میں کئی تعلیمی اداروں کو بند کر دیا گیا ہے۔
وفاقی وزیرتعلیم شفقت محمود کے مطابق جس تعلیمی ادارے میں کورونا کیسز سامنے آئیں گے اسے بند کر دیا جائے گا۔
اس سے قبل اسلام آباد کے ایک میڈیکل کالج کو بھی کورونا کیسز کی وجہ سے بند کر دیا گیا تھا۔
وفاقی دارالحکومت اسلام آباد کے تعلیمی اداروں میں بھی کورونا وائرس کے کیسز میں اضافہ دیکھنے میں آیا ہے۔
وزیراعظم عمران خان بھی ایک سے زائد مرتبہ پاکستان میں کورونا کی دوسری لہر کے خدشات کا اظہار کر چکے ہیں، انہوں نے عوام سے ایس او پیز پر عمل کرنے کی اپیل بھی کی ہے۔
