سپریم کورٹ نے جنگ/جیو گروپ کے مالک میر شکیل الرحمن کی درخواست ضمانت بعد از گرفتاری میں نیب کو نوٹس جاری کرتے ہوئے کیس کی سماعت دو ہفتوں تک کے لئے ملتوی کردی۔
جسٹس مشیر عالم کی سربراہی میں قائم 3 رکنی بینچ نے کیس کی سماعت کی۔
میر شکیل کے وکیل خواجہ حارث نے عدالت کو بتایا کہ میرے موکل کے خلاف 1986 کے اراضی کے معاملے پر کیس بنایا گیا۔
جسٹس مشیر عالم نے استفسار کیا کہ یہ اراضی کس کی تھی اور کس نے دی۔
وکیل نے بتایا کہ یہ اراضی ایل ڈی اے کی تھی جو منظوری کے بعد دی گئی، متعلقہ اراضی وزیراعلیٰ پنجاب کی منظوری سے دی گئی۔
جسٹس قاضی امین نے استفسار کیا کہ میر شکیل کب گرفتار ہوئے جس پر وکیل نے کہا کہ 12 مارچ 2020 کو میر شکیل کو گرفتار کیا گیا۔
جسٹس قاضی امین نے استفسار کیا کہ کیا کیس میں چارج فریم ہوا ہے؟ وکیل نے کہا کہ میرے موکل ابھی جوڈیشل ریمانڈ پر ہیں، گرفتاری کی بنیاد پرانے اراضی کیس کو بنایا گیا۔
عدالت نے نیب کو نوٹس جاری کرتے ہوئے ٹرائل کورٹ سے ریکارڈ طلب کر لیا اور سماعت دو ہفتوں کے لیے ملتوی کر دی۔
