مسلم لیگ (ن) کے رکن پنجاب اسمبلی فیصل خان نیازی نے پارٹی رکنیت سے استعفیٰ دے دیا۔
فیصل خان نیازی ان افراد میں شامل تھے جنہوں نے وزیراعلیٰ پنجاب عثمان بزدار کے ساتھ ملاقات کی تھی جس کے بعد تمام اراکین کو شو کاز نوٹس جاری کرتے ہوئے ن لیگ سے نکال دیا گیا تھا۔
مسلمم لیگ ن پنجاب کی سیکرٹری اطلاعات عظمیٰ بخاری نے فیصل نیازی کے استعفیٰ کی تصدیق کرتے ہوئے کہا کہ انہوں نے اپوزیشن لیڈر کے چیمبر میں بیٹھ کر یہ استعفیٰ لکھا تھا۔
محمد فیصل خان نیازی پنجاب اسمبلی کے حلقہ پی پی 209 خانیوال سے مسلم لیگ (ن) کے ٹکٹ پر منتخب ہوئے ہیں۔
میاں جلیل شرقپوری کے سر پر لوٹا رکھ دیا گیا
پنجاب اسمبلی کے اجلاس کے موقع پر مسلم لیگ ن کے اراکین اسمبلی نے احتجاج کرتے ہوئے ان ارکان کا گھیراؤ کر لیا جنہوں نے وزیراعلیٰ پنجاب کے ساتھ ملاقات کی تھی۔
ن لیگی اراکین پنجاب اسمبلی نے عثمان بزدار سے ملاقات کرنے والوں کو ایوان میں داخل ہونے سے بھی روک دیا۔
اس کے علاوہ انہوں نے مسلم لیگ (ن ) کے رکن پنجاب اسمبلی میاں جلیل شرقپوری کے سر پر لوٹا رکھ دیا، بعد ازاں انہوں نے اس سلوک پر اسپیکر کو درخواست جمع کرا دی۔
ان کا کہنا تھا کہ اس معاملے میں جماعت ملوث نہیں تھی بلکہ چند افراد کا معاملہ ہے، انہوں نے بتایا کہ لیگی رکن میاں رؤف اور دیگر نے ان کے ساتھ یہ سلوک کیا۔
میاں جلیل شرقپوری کا کہنا ہے کہ نواز شریف کو اداروں کے خلاف اتنی سخت زبان استعمال نہیں کرنی چاہیے۔
انہوں نے مزید کہا کہ وزیراعلیٰ سے ملنا کوئی غلط بات نہیں، مجھے روکنے کے بجائے عثمان بزدار کو روکنا چاہیئے۔
اس سے پہلے مسلم لیگ ن کے ارکان نے مولانا غیاث الدین کو ایوان سے نکال دیا تھا۔
