فواد چوہدری نے ٹک ٹاک سے پابندی ہٹانے کے لیے وزیراعظم کو خط لکھ دیا

اسلام آباد: وفاقی وزیر سائنس و ٹیکنالوجی فواد چودھری نے کہا ہے کہ ٹک ٹاک پر پابندی جیسے فیصلوں سے پاکستان کی ٹیکنالوجی بیٹھ جائے گی۔

وفاقی وزیر نے کہا کہ انہوں نے وزیراعظم عمران خان کو خط لکھا ہے جس میں درخواست کی ہے کہ ٹیکنالوجی پر پابندی نہ لگائی جائے۔

انہوں نے مزید کہا کہ ڈیجیٹل ٹیکنالوجی پر توجہ دی جا رہی ہے، پولیس اہلکاروں کیلئے خصوصی اردو سافٹ ویئر تیار کر رہے ہیں جس  کے ذریعے انہیں مزید آسانی ہو گی۔

حزب اختلاف کے متعلق ان کا کہنا تھا کہ ابو بچاؤ مہم، انتشار پھیلاؤ مہم میں تبدیل ہو گئی ہے، اپوزیشن کا تمام زور اپنے 8 کیسز پر ہے۔

فواد چوہدری نے کہا کہ اگر ن لیگ استعفوں کا اعلان کرے گی تو زیادہ سے زیادہ 18 لوگ  ہی استعفیٰ دیں گے۔

انہوں نے کہا کہ اپوزیشن جماعتوں نےالیکشن لڑا اور ہار گئے، آئین کے مطابق آپ 5 سال انتظار کریں۔

انہوں نے مزید کہا کہ مریم نواز اور ان کی تحریک کی کوئی اخلاقی حیثیت نہیں، یہ اس لیے انتظار نہیں کر سکتے کیونکہ یہ جیلوں میں جا رہے ہیں۔

فواد چودھری نے کہا کہ نوازشریف نے اپنا تمام پیسہ بیٹوں کے نام کیا ہوا ہے انہیں چاہیے کہ کچھ پیسے مریم نواز کے نام بھی کریں۔

انہوں نے کہا کہ  سیالکوٹ صنعت وتجارت کے ساتھ مل کر وزارت سائنس وٹیکنالوجی بہت کام کر رہی ہے، وزارت سائنس وٹیکنالوجی نے میڈ ان پاکستان کا بہترین پروگرام دیا ہے۔

وفاقی وزیر نے کہا کہ وزیراعظم عمران خان کی حکمت عملی سے کورونا پر بڑے اچھے طریقے سے قابو پایا ہے۔

ان کا کہنا تھا کہ کورونا ویکسین کی تیاری دنیا میں آخری مراحل میں ہے یہ ایک نئی بیماری ہے اس پر دنیا میں ابھی اتنی ریسرچ نہیں ہوئی اس لیے احتیاط کی ضرورت ہے۔