پاک سوزوکی پاکستان میں گاڑیوں کی قیمتوں میں ایک مرتبہ پھر اضافہ کر دیا ہے۔
قیمتوں میں ہونے والے اس اضافے سے ویگنار آر وی ایکس آر 42 ہزار روپے جبکہ آلٹو (وی ایکس آر اور اے جی ایس) اور ویگن آر وی ایکس ایل اور سوئفٹ (ایم ٹی اور اے ٹی) 35 ہزار روپے مہنگی ہو گئی ہیں۔
ان قیمتوں کا اطلاق آج 15 اکتوبر سے ہو گا۔
کمپنی کا کہنا ہے کہ قیمتوں میں اضافہ ڈالر کی قدر بڑھنے کے باعث کیا گیا ہے لیکن گزشتہ کئی ہفتوں سے روپے کے مقابلے میں ڈالر کی قیمت کم ہوئی ہے جس کی وجہ سے یہ جواز ناقابل فہم ہے۔
سوزوکی آلٹو کی قیمتوں میں اس سال یہ دوسرا اضافہ ہے، جولائی 2020 میں آلٹو کے بنیادی ماڈل وی ایکس کی قیمتوں میں بڑا اضافہ کیا گیا تھا جس کے بعد اس کی قیمت 11 لاکھ 98 ہزار ہو گئی تھی۔
سوزوکی نے یہ نوٹس بھی جاری کیا تھا کہ جن افراد نے گاڑیوں کی بکنگ کرائی ہوئی ہے ان کے لیے پرانی قیمتیں برقرار رہیں گی۔
یہ بات بھی اہم ہے کہ سوزوکی نے صرف ان ماڈلز کی قیمتوں میں اضافہ کیا ہے جن کی پاکستان میں فروخت زیادہ ہے۔
پاکستان آٹوموٹو مینوفیکچررز ایسوسی ایشن (پی اے ایم اے) کے ڈیٹا کے مطابق پاکستان میں سوزوکی سوئفٹ، ویگنار آر اور آلٹو کی فروخت میں اضافہ ہوا ہے جبکہ سوزوکی کلٹس کی فروخت گزشتہ 3 ماہ کے دوران کم ہوئی ہیں۔
