نیشنل ٹی ٹونٹی کپ، کھلاڑی سے بکی کے رابطے کا انکشاف

پاکستان کرکٹ بورڈ کے مطابق نیشنل ٹی ٹونٹی کپ کے دوران ایک کھلاڑی سے بکی کی جانب سے رابطے کا انکشاف ہوا ہے۔

پی سی بی کے اینٹی کرپشن یونٹ کی جانب سے تحقیقات کا آغاز کر دیا گیا ہے۔ حکام کا کہنا ہے کہ معاملے کو وفاقی تحقیقاتی ادارے کے سپرد کرنے سے قبل بورڈ خود تحقیقات کرے گا۔

پی سی بی اینٹی کرپشن یونٹ کے ڈائریکٹر لیفٹننٹ کرنل آصف محمود کا کہنا ہے کہ میں نے شکایت درج کرانے والے کھلاڑی سے رابطہ کیا ہے اور اینٹی کرپشن یونٹ کو مطلع کرنے پر شکریہ ادا کیا ہے۔

ان کا کہنا تھا کہ کھلاڑیوں کا یہ رویہ اینٹی کرپشن سے متعلق تعلیماتی سیشنز کا نتیجہ ہے جس سے ثابت ہوتا ہے کہ کھلاڑی پی سی بی کے اصول و ضوابط سے مکمل طور پر واقف ہیں۔

ان کا کہنا تھا کہ کھلاڑیوں کا بورڈ کے اینٹی کرپشن یونٹ پر اعتماد ہمارے لیے امید افزا ہے۔

کھلاڑی کی جانب سے اطلاع ملنے کے بعد پاکستان کرکٹ بورڈ نے متعلقہ معلومات وفاقی تحقیقاتی ادارے کو بھیج دی ہیں جہاں دیگر ماہرین معاملے کی تہہ تک پہنچنے کی کوشش کریں گے۔

ان کا کہنا تھا کہ معاملے سے متعلق کسی قسم کی معلومات فراہم کرنا تحقیقات کو مشکوک کر دے گا لیکن آئی سی سی کے ذمہ دار رکن ہونے کے ناطے پاکستان کرکٹ بورڈ آئی سی سی کے متعلقہ حکام کو معاملے سے آگاہ کرے گا۔

یاد رہے 30 ستمبر سے شروع ہونے والی نیشل ٹی ٹونٹی کپ کا فائنل 18 اکتوبر کو کھیلا جائے گا۔

ٹورنامنٹ کے تمام میچوں کو دو مرحلوں میں تقسیم کیا گیا تھا۔ پہلے مرحلے کے میچ 30 ستمبر سے 6 اکتوبر تک ملتان میں کھیلے گئے۔

دوسرے مرحلے کے میچ 9 سے 18 اکتوبر تک راولپنڈی میں شیڈول کیے گئے تھے۔

ٹورنامنٹ میں 6 ٹیمیں شریک ہیں۔