نوکیا کی جانب سے ملازمت پیشہ افراد کی حفاظت کے لیے ایک ایسا نظام متعارف کرایا گیا ہے جو اس بات کی نشاندہی کر سکے گا کہ مطلوبہ شخص میں کورونا کی علامات موجود ہیں یا نہیں۔
نوکیا کے متعاف کرائے گئے سسٹم میں لگا تھرمل کیمرا اس بات کی نشاندہی بھی کرے کہ دفتر میں داخل ہونے والے شخص نے ماسک پہن رکھا ہے یا نہیں۔
فن لینڈ کی کمپنی بھارت کے شہر چنائی میں گزشتہ 2 ماہ سے اپنی فیکٹری میں ان آلات کو استعمال کر رہی ہے جن کے ذریعے اب تک تقریباً 2 لاکھ افراد کی اسکریننگ کی جا چکی ہے۔
تقریباً ایک ہزار ملازمین رکھنے والی فن لینڈ کی اس کمپنی کو بھارت میں کورونا لاک ڈاون کے باعث بند کر دیا گیا تھا۔
نوکیا کی جانب سے جاری بیان میں وضاحت کی گئی ہے کہ دفاتر میں لگایا گیا یہ سسٹم ہر داخل ہونے والے شخص کے بخار کو چیک کرے گا اور ماسک نہ پہننے کی صورت میں الارم بجا کر آپریشن سنٹر کو اطلاع بھی دے گا۔
اس سسٹم میں پرائیویسی کو مدنظر رکھتے ہوئے چہروں کو دھندلا یا غیرواضح بھی کیا جا سکتا ہے، اس سسٹم کو مختلف چیک پوائنٹس پر بھی لگایا جا سکتا ہے نیز اسے آپریٹ کرنے کے لیے کسی فرد کی ضرورت نہیں ہوگی۔
نوکیا کے ترجمان نے بتایا ہے کہ اس نظام کو نوکیا کے دفاتر اور آر اینڈ ڈی سینٹرز میں نصب کیا جارہا ہے۔
انہوں نے بتایا کہ ابتدائی طور پر اس نظام کو شمالی اور لاطینی امریکہ میں متعارف کرایا جائے گا، جس کے بعد ایشیا اور دیگر اسکولوں اور سرکاری عمارتوں کو بھی اسے استعمال کرنے کی پیشکش کی جائے گی۔
