گوجرانوالہ: پاکستان ڈیموکریٹک موومنٹ (پی ڈی ایم) کا پہلا جلسہ آج گوجرانوالہ میں ہوگا جس کی تمام تیاریاں مکمل کرلی گئی ہیں اور کارکنوں کی آمد جاری ہے۔
پاکستان مسلم لیگ (ن)، پاکستان پیپلز پارٹی (پی پی پی) اور جمعیت علمائے اسلام (ف) سمیت 11 اپوزیشن جماعتوں کا اتحاد پی ڈی ایم اس جلسے کے لیے عوامی طاقت کا اظہار کرنا چاہتا ہے۔
ن لیگ کی نائب صدرمریم نواز اور پی ڈی ایم کے سربراہ مولانا فضل الرحمان قافلوں کے ہمراہ گوجرانوالہ پہنچیں گے۔
پیپلزپارٹی کے چیئرمین بلاول بھٹو زرداری گزشتہ روز ہی گجرات میں لالا موسیٰ کے مقام پر قمر زمان کائرہ کی رہائش گاہ پہنچ گئے ہیں، وہ وہیں سے ریلی کی صورت میں جلسے کے مقام تک پہنچیں گے۔
مسلم لیگ (ن) کی صدر مریم نواز جاتی امرا سے ایک قافلے کی شکل میں گوجرانوالہ کی جانب روانہ ہوں گی۔
جاتی امرا کے باہر ن لیگی کارکنوں کی بڑی تعداد پہنچنا شروع ہوگئی ہے اور بکروں کا صدقہ بھی دیا گیا ہے۔
جلسہ دوپہر 3 بجے شروع ہوگا اور رات 12 بجے تک اسے ختم کرنا ہوگا۔ گوجرانوالہ کے جناح اسٹیڈیم میں پی ڈی ایم کی قیادت کیلئے 80 فٹ لمبا 24 فٹ چوڑا اسٹیج تیار کیا گیا ہے۔ جناح اسٹیڈیم 6 ایکڑ پر محیط ہے اور اس میں 35 ہزار افراد کی گنجائش ہے۔
انتظامیہ نے اعلان کیا ہے کہ صرف پیدل افراد کو جلسہ گاہ کی طرف جانے دیا جائے گا۔
سی پی او گوجروانوالہ سرفراز فلکی کے مطابق کورونا ایس او پیز پر عملدرآمد کو ہر صورت یقینی بنایا جائے گا اور قانون کی خلاف ورزی پر سخت ایکشن لیا جائے گا۔
اپوزیشن جماعتوں کی جانب سے کہا گیا ہے کہ وہ ایس اوپیز پر عمل درآمد کو یقینی بنائیں گے۔
پی ڈی ایم کا کوئی رہنما اسٹیڈیم کے علاوہ کسی جگہ تقریر نہیں کرے گا۔ پی ڈی ایم جی ٹی روڈ بند نہیں کرے گی۔ جلسے میں ملکی سلامتی کے اداروں اور خلاف آئین کوئی تقریر نہیں کی جائے گی۔
