بالی ووڈ کے معروف اداکار سنجے دت کے کینسر میں مبتلا ہونے کی غیرمصدقہ خبریں میڈیا میں گردش کر رہی تھیں، اب انہوں نے خود ان کی تصدیق کر دی ہے۔
انسٹاگرام پر اپنی ویڈیو میں 61 سالہ اداکار نے کہا ہے کہ انہیں کینسر کا مرض لاحق ہو گیا ہے تاہم وہ اسے شکست دینے میں کامیاب ہو جائیں گے۔
سنجے دت کی گرفتاری اور اعتراف جرم کی تفصیلی کہانی سابق پولیس کمشنر کی زبانی
سنجے دت اور رشی کپور، رقابتیں، جھگڑے اور آخرکار لازوال دوستی کی داستان
سنجے دت نے مزید کہا کہ وہ نومبر میں اپنی نئی فلم کی شوٹنگ بھی شروع کر رہے ہیں۔
اگست میں سنجے دت کو سانس کی تکلیف ہوئی تو ان کا کورونا ٹیسٹ لیا گیا جو خوش قسمتی سے منفی نکلا، بعد میں ممبئی کے لیلا وتی اسپتال میں ان کے دیگر بیماریوں کے ٹیسٹ لیے گئے۔
اگست میں میڈیا میں خبریں گردش کرنے لگیں کہ وہ پھیپھڑوں کے کینسر میں مبتلا ہو گئے ہیں، اسی ماہ انہوں نے کہا تھا کہ وہ بیماری کے علاج کی وجہ سے فلموں سے عارضی وقفہ لے رہے ہیں۔
سنجے دت اور ان کی اہلیہ نے مختلف بیانات میں مداحوں سے کہا تھا کہ وہ ان کی طبیعت کے متعلق غیرضروری قیاس آرائیوں سے پرہیز کریں۔
اپنی حالیہ ویڈیو میں انہوں نے کیمرے کا رخ ایک نشان کی طرف کیا جو ان کی بائیں ابرو سے شروع ہو کر سر کی جانب جا رہا ہے۔
انہوں نے کہا کہ یہ داغ حال ہی میں نمودار ہوا ہے لیکن میں اسے جلد شکست دے دوں گا، میں جلد ہی اس کینسر سے باہر نکل آؤں گا۔
انہوں نے مزید کہا کہ وہ اپنی آنے والی فلم کے لیے سیٹ پر پہنچنے پر بہت خوش ہیں۔
سنجے دت کا فلمی کیرئیر اتارچڑھاؤ کا شکار رہا ہے، 2013 میں 5 سال قید کے بعد جیل سے واپسی پر ان کی اداکاری میں جمود آ گیا تھا، انہیں آتشیں اسلحہ رکھنے کے جرم میں قید ہوئی تھی جس کا تعلق 1993 میں ممبئی میں ہونے والے دھماکوں سے جڑتا تھا جن میں 257 افراد ہلاک اور 713 زخمی ہوئے تھے۔
تاہم 2016 میں انہیں ایک مرتبہ پھر کامیابیاں ملنا شروع ہوئیں، ان کی کئی فلموں نے باکس آفس پر بہت اچھا بزنس کیا، ان کی زندگی پر بنائی گئی فلم بھی بہت کامیاب رہی جس می رنبیر کپور نے سنجے دت کا کردار ادا کیا۔
