گوگل نے ایک نیا فیچر متعارف کرایا ہے جس کے ذریعے اپنا پسندیدہ نغمہ تلاش کرنا آسان ہو جائے گا۔
اپنے آفیشل بلاگ میں گوگل نے بتایا ہے کہ اگر آپ کے ذہن میں کسی نغمے کی دھن موجود ہے مگر الفاظ یاد نہیں آ رہے اور آپ اسے سرچ کرنا چاہتے ہیں تو دس پندرہ سیکنڈ کے ذریعے گوگل سرچ میں جا کر گنگنائیں اور اس دھن سے ملتے جلتے تمام نغمے آپ کے سامنے ڈھیر کر دیے جائیں گے۔
اس کے لیے اپنے موبائل پر گوگل کی تازہ ترین ایپ ڈاؤن لوڈ کرنی پڑے گی، اس میں مائیک کے آئیکون پر ٹچ کر کے دریافت کریں کہ یہ کون سا نغمہ ہے۔
دوسرا آپشن یہ ہے کہ گوگل کے ‘سرچ اے سانگ’ بٹن پر ٹچ کریں اور نغمہ گنگنا دیں، سرچ میں اس سے مماثل دھن والے گیتوں کے لنک سامنے آ جائیں گے۔
اسی طرح گوگل اسسٹنٹ میں جا کر بھی پوچھ سکتے ہیں کہ یہ کون سا نغمہ ہے اور ساتھ گنگنانا شروع کر دیں۔
اس وقت یہ فیچر صرف آئی او ایس کے انگریزی ورژن میں مہیا کیا گیا ہے اور اس میں 20 سے زائد زبانوں میں گیت گنگنا کر تلاش کیے جا سکتے ہیں۔
گوگل کا کہنا ہے کہ جب آپ گنگنانا روک دیں گے تو گوگل کا ایلگورتھم اس سے ملتے جلتے نغمے تلاش کرے گا، اس کے لیے بہترین آواز کی ضرورت بھی نہیں ہے، اگر خام انداز میں بھی گنگنا دیا جائے تب بھی یہ فیچر کام کرے گا۔
گوگل اپنے نتائج میں نغمے اور گلوکار کا نام بتا دے گا جسے آپ اپنی پسندیدہ ایپ پر سن سکیں گے۔
