کانگریس کے رہنما راہول گاندھی نے عالمی مالیاتی ادارے کی بھارتی معیشت سے متعلق رپورٹ پر حکومت کو شدید تنقید کا نشانہ بنایا ہے۔
اپنے ٹویٹر پیغام میں انہوں نے آئی ایم ایف کا عالمی معیشت کے حوالے سے نقشہ دکھایا، انہوں نے لکھا کہ پاکستان اور افغانستان نے بھی بھارت سے زیادہ بہتر طریقے سے کورونا کو ختم کرنے میں کردار ادا کیا۔
بنگلہ دیش رواں برس فی کس آمدنی میں بھارت سے آگے بڑھ جائے گا، آئی ایم ایف
عالمی معیشت پر نظر رکھنے والے ادارے کی رپورٹ کے مطابق رواں سال کورونا کے باعث بھارت کی معیشت 10.3 فیصد سکڑنے کا امکان ہے جو چین، بھوٹان، سری لنکا، بنگلہ دیش، میانمار، نیپال اور افغانستان جیسے ممالک کی معاشی صورتحال کی نسبت زیادہ خطرناک ہے۔
اپنے ٹویٹر پیغام میں انہوں نے کہا کہ یہ بی جے پی کی حکومت کا ایک اور کارنامہ ہے۔
دنیا بھر میں کورونا لاک ڈاون کی صورتحال کے پیش نظر آئی ایم ایف نے تمام ممالک کی معیشت کے حوالے سے ایک رپورٹ جاری کی تھی۔
اس سے قبل اپوزیشن رہنما راہول گاندھی نے بنگلہ دیش کی معیشت کے حوالے سے بھی حکومت کو شدید تنقید کا نشانہ بنایا تھا۔
آئی ایم ایف نے اپنی رپورٹ میں بتایا تھا کہ بھارت میں کورونا وائرس کی وجہ سے معیشت میں خاصا بگاڑ دیکھنے میں آیا ہے جس کے باعث بنگلہ دیش کا جی ڈی پی ریٹ بھارت کے موجودہ جی ڈی پی کے قریب پہنچ گیا ہے۔
رپورٹ کے مطابق کورونا وبا کے باعث رواں برس بھارتی معیشت کے 10.3 فیصد تک سکڑ جانے کی پیش گوئی کی گئی تھی اور کہا تھا کہ اس کا حجم کم ہو کر 1.888 ٹریلین ڈالر تک آ جائے گا۔
دوسری جانب بنگلہ دیش کی معیشت بڑھ کر 1.876 ٹریلین ڈالر تک پہنچنے کا امکان ہے۔
آئی ایم ایف کی ایک نئی رپورٹ کے مطابق آئندہ سال بھارت اپنی مشکل صورتحال پر قابو پاتے ہوئے اپنی معیشت میں 8.8 فیصد کا اضافہ کرے گا جو چین کے معاشی ہدف 8.2 سے زیادہ ہے۔
