خلائی ادارے ناسا نے فن لینڈ کی کمپنی نوکیا کو چاند پر اپنا پہلا سیلولر نیٹ ورک بنانے کے لیے منتخب کر لیا ہے۔
عالمی خبررساں ادارے رائٹرز کے مطابق یہ قمری نیٹ ورک امریکا کے خلائی ادارے ناسا کے اس منصوبے کا حصہ ہے جس کے تحت 2014 تک انسانوں کو چاند پر بسانے کی توقع کی جا رہی ہے۔
نوکیا کی جانب سے جاری بیان میں بتایا گیا ہے کہ چاند پر پہلا براڈ بینڈ کمیونیکیشن سسٹم 2022 کے اواخر میں انسانوں کے قدم رکھنے سے پہلے قائم کیا جائے گا۔
کمپنی ٹیکساس کی معروف خلائی کمپنی کے ساتھ اشتراک کرے گی جو سیلولر نیٹ ورک بنانے کے تمام آلات اسپیس ایئرکرافٹ کے ذریعے چاند پر پہنچائے گی۔
نوکیا کے مطابق آلات کی ترسیل کے بعد نیٹ ورک کی رسائی ممکن ہو سکے گی جو کہ چاند پر پہلا طویل مدتی مواصلاتی نظام ہوگا۔
یہ نیٹ ورک چاند پر جانے والے خلابازوں کو آواز اور ویڈیو کالز کی سہولت فراہم کرے گا، اس کے علاوہ وہ ڈیٹا بھی زمین پر بھیج سکیں گے۔
اس کے علاوہ چاند کے دوردراز علاقوں میں روبوٹ روور بھیجنے اور انہیں کنٹرول کرنے کا کام بھی اسی نیٹ ورک کے ذریعے سرانجام دیا جائے گا۔
ناسا کا 2024 تک انسانوں کو دوبارہ چاند پر پہنچانے کا منصوبہ ہے جہاں وہ طویل عرصہ رہیں گے، اس سے قبل انسان چاند پر مختصر وقت کے گئے تھے۔
