بالی ووڈ اداکارہ لیونیا لودھ کا مہیش بھٹ پر ہراسانی کا الزام

بالی ووڈ اداکارہ لیونیا لودھ نے معروف فلم ساز مہیش بھٹ پر ہراسانی کا الزام لگاتے ہوئے انہیں فلم انڈسٹری کا سب سے بڑا ڈان قرار دے دیا۔

لیونیا لودھ کی طرف سے سوشل میڈیا پر شیئر کی گئی تقریباً 2 منٹ کی ویڈیو نے بالی ووڈ میں ڈرگ اسمگلنگ اور اداکاروں کے استعمال سے متعلق نیا پنڈورا باکس کھول دیا ہے۔

اداکارہ نے اپنی فیملی کے تحفظ کے لیے بنائی گئی ویڈیو میں دیگر کئی  انکشافات کے ساتھ ساتھ یہ بھی کہا کہ وہ مہیش بھٹ کے بھتیجے سمت سبھروال کی بیوی ہیں اور انہوں نے اس سے طلاق کے لیے درخواست دائر کر رکھی ہے۔

لیونیا لودھ نے مہیش بھٹ کو بالی ووڈ کا سب سے بڑا ڈان قرار دیتے ہوئے کہا کہ مہیش بھٹ انڈسٹری کا پورا سسٹم چلاتا ہے، اگر آپ اس کے قوانین پرعمل نہیں کرتے تو آپ کی زندگی مشکل بنا دیتا ہے۔

انہوں نے الزام عائد کیا کہ مہیش بھٹ نے کام سے نکلوا کر کئی لوگوں کی زندگیاں برباد کردیں، اس کے ایک فون پر لوگ اپنی ملازمت کھو دیتے ہیں۔

اداکارہ نے کہا کہ جب سے میں نے ان کے خلاف مقدمہ درج کرایا ہے، تب سے وہ مجھے دھمکیاں دے رہا ہے، میرے گھر میں داخل ہونے اور مجھے یہاں سے بے دخل کرنے کی کوشش کر رہا ہے۔

وشیش فلمز کے قانونی مشیر نے مہیش بھٹ کی طرف سے جوابی بیان جاری کر دیا ہے جس میں انہوں نے الزامات کی تردید کرتے ہوئے قانونی چارہ جوئی کا اعلان کیا ہے۔

بالی وڈ انڈسٹری کی کئی اداکاراؤں نے جنسی ہراسانی کے خلاف بولنا شروع کر دیا ہے، گزشتہ دنوں معروف اداکارہ کنگنا رناوت نے بھارتی فلم انڈسٹری پر سنگین الزامات عائد کیے تھے۔

ان کے انکشافات کے بعد کنگنا کو دھمکیاں ملنا شروع ہو گئی تھیں، ان کی درخواست پر وفاقی حکومت نے سیکیورٹی فراہم کر دی تھی۔