پاکستان کی تاریخ کی سب سے بڑی پلی بارگین میں ملزم نے ایک ارب 29 لاکھ روپے ادائیگی کی پیشکش کی ہے، ملزم یہ رقم 3 اقساط میں ادا کرے گا۔
نیب نے احتساب عدالت کو بتایا ہے کہ پاکستان اسٹیٹ آئل (پی ایس او) اور نجی آئل کمپنی بائیکو کے آفیشلز کی جانب سے 23 ارب روپے کی کرپشن کے معاملے پر ملزم کامران افتخار نے پلی بارگین کی درخواست دی ہے۔
نیب نے عدالت کو بتایا کہ ملزم ایک ارب 29 لاکھ روپے 3 اقساط میں ادائیگی کرنے کے لیے تیار ہے۔
ملزم نجی کمپنی بائیکو کا ملازم تھا جس نے پی ایس او کے ساتھ معاہدے میں دیگر ملزمان کے ساتھ ملی بھگت سے قومی خزانے کو مجموعی طور پر 23 ارب سے زائد کا نقصان پہنچایا۔
واضح رہے چیئرمین نیب نے ملزم کی جانب سے دائر کی گئی پلی بارگین کی درخواست پر دستخط کردیے ہیں، کیونکہ ملزم لوٹی ہوئی دولت واپس قومی خزانے میں جمع کرانے کے لیے تیار ہوگیا ہے
عدالت نے ریفرنس کے ایک ملزم کامران افتخار لاری کی پلی بارگین کی درخواست منظور کرتے ہوئے ریفرنس کی مزید سماعت ملتوی کردی۔
