قاہرہ : مصر کی پولیس نے 57 سالہ بھکارن کو گرفتار کیا ہے جو 5 رہائشی عمارتوں کی مالکن ہے اور اس کے بینک اکاؤنٹس میں 3 کروڑ روپے جمع ہیں۔
مقامی میڈیا کے مطابق نفیسہ نامی بھکارن وہیل چیئر پر بھیک مانگا کرتی تھی اور ایک ٹانگ سے محروم ہونے کا تاثر دیتی تھی، اس کے ساتھ ساتھ یہ ملک کے مختلف صوبوں میں جا کر پیسے مانگا کرتی تھی۔
پولیس کی تحقیقات سے معلوم ہوا ہے کہ کئی مقامات پر یہ خاتون خود کو مفلوج ظاہر کرتی تھی لیکن بھیک مانگنے کے بعد اسے تندرست حالت میں چلتے دیکھا گیا جس کے بعد اسے گرفتار کر لیا گیا۔
گرفتاری کے بعد پولیس کو علم ہوا کہ اسے کوئی بیماری لاحق نہیں ہے اور وہ 5 عمارتوں کی مالکن ہے اور اس کے مختلف اکاؤنٹس میں 30 لاکھ مصری پاؤنڈ (3 کروڑ پاکستانی روپے) جمع ہیں۔
اس سے قبل لبنان میں بھی ارب پتی بھکاری عورت کو گرفتار کیا گیا تھا۔ لبنان کی سڑکوں پر بھیک مانگنے والی خاتون کے بنک اکاؤنٹ میں سوا ارب لبنانی پاؤنڈ موجود ہونے کا انکشاف ہوا تھا۔
خاتون ہسپتال کے باہر بھیک مانگتی تھی۔ پاکستانی کرنسی میں یہ رقم 13 کروڑ روپے بنتی ہے۔
اسی طرح دبئی کی ایک مسجد کے قریب بھی ایک خاتون کو بھیک مانگتے پایا گیا جو اپنی لینڈ کروزر سے تھوڑی پہلے ہی اتری تھی۔
گزشتہ دنوں پاکستان میں ایک بھکاری موٹرسائیکل کی ٹکر سے زخمی ہوا، جب اسے اسپتال لے جایا گیا تو اس کے کپڑوں سے بھاری رقم برآمد ہوئی تھی۔
