فرانس میں عربی بولنے پر بہن بھائی پر نسل پرستوں کا حملہ

پیرس کے مضافاتی قصبے میں اردن سے تعلق رکھنے والے بہن، بھائی پر نسل پرستوں نے اس وقت حملہ کر دیا جب انہیں آپس میں عربی بولتے سنا گیا۔

زخمی ہونے والے لڑکے ابوعید کا کہنا ہے کہ ان پر ایک فرانسیسی مرد اور اس کی ساتھی عورت نے حملہ کیا اور انہیں بری طرح مارا پیٹا گیا۔

دونوں کو اسپتال پہنچایا گیا جہاں ان کی حالت خطرے سے باہر بتائی جا رہی ہے۔

اردن کے بادشاہ عبداللہ نے اس واقعہ کی اطلاع ملنے پر دونوں زخمیوں کو فون کال کی اور ان کی خیریت دریافت کی۔ انہوں نے فرانس میں اردن کے سفارتخانے کو ہدایت کی کہ وہ انہیں ہر ممکن مدد فراہم کریں۔

مقامی میڈیا سے بات کرتے ہوئے ابوعید نے بتایا کہ حملہ آوروں نے ہمیں ایک بس اسٹاپ پر عربی بولتے سنا تو ان پر حملہ کر دیا۔ پولیس ابھی تک مجرموں کو تلاش کر رہی ہے۔

انہوں نے فرانسیسی حکام کے تعاون پر ان کی تعریف کی اور اردن کے سفارتخانے کا شکریہ ادا کیا۔

ابوعید فرانس کے سرکاری اسکول میں عربی کے استاد ہیں جبکہ ان کی بہن حبا ابوعید اپنی ماسٹرز کی تعلیم حاصل کر رہی ہیں۔

فرانس میں پیغمر اسلام ﷺ کے خاکے طلبہ کو دکھانے والے استاد کا سر قلم کرنے کے واقعہ کے بعد سے نسل پرست حملوں میں اضافہ ہوا ہے۔

جمعرات کو حجاب لینے والی 2 خواتین پر ایفل ٹاور کے قریب خنجروں سے حملہ کیا گیا تھا جس میں وہ شدید زخمی ہو گئی تھیں۔