پاکستان میں کورونا کی دوسری لہر شدید تر ہوتی جا رہی ہے جس کی وجہ سے فعال کیسز کی تعداد میں بھی اضافہ ہو رہا ہے اور اموات بھی بڑھ رہی ہیں۔
گزشتہ 24 گھنٹوں کے دوران مزید 6 افراد کورونا کے باعث انتقال کر گئے ہیں جس کے بعد اموات کی تعداد 6 ہزار 745 ہو گئی ہے۔
ملک بھر میں کورونا کے فعال کیسز کی تعداد 11 ہزار 190 ہو گئی ہے۔
نیشنل کمانڈ اینڈ آپریشن سینٹر کے جاری کردہ اعدادوشمار کے مطابق ملک میں 24 گھنٹے کے دوران 27 ہزار 133 ٹیسٹ کیے گئے ، جس میں سے کورونا کے 773 نئے کیسز سامنے آئے۔
ملک بھر میں کورونا کے مصدقہ کیسز کی تعداد 3 لاکھ 29 ہزار 375 ہو گئی ہے، گزشتہ 24 گھنٹوں کے دوران 365 مریض صحتیاب ہو چکے ہیں جس کے بعد صحتیاب افراد کی کل تعداد 3 لاکھ 11 ہزار 440 ہو گئی ہے۔
نیشنل کمانڈاینڈآپریشن سینٹر نے کہا ہے کہ فعال کورونا کیسز میں سے 576 سنجیدہ نوعیت کے ہیں۔
اعداد و شمار کے مطابق سندھ میں کورونا کے مریضوں کی تعداد سندھ میں ایک لاکھ 44 ہزار114 ، پنجاب میں ایک لاکھ 3 ہزار 82 ، خیبر پختونخوا میں 39 ہزار119 ہوگئی ہے۔
بلوچستان میں کورونا کے 15 ہزار 839 ، گلگت بلتستان میں 4 ہزار 191 اور آزاد کشمیر میں 3 ہزار 849 کیسز رپورٹ ہوئے ہیں۔
نیشنل کمانڈ اینڈ آپریشن سینٹر کے اجلاس میں بریفنگ میں بتایا گیا تھا کہ ملک بھر میں کورونا وائرس کے مثبت کیسز اور اموات کی شرح بڑھ رہی ہے، گزشتہ 4 روز کے دوران مثبت کیسز کی شرح میں 40 فیصد اضافہ ہوا۔
حکام قومی صحت کے مطابق کراچی، حیدر آباد، مظفر آباد اور گلگت میں مثبت کرونا وائرس کیسز کی شرح میں اضافہ ہوا، پنجاب کے اسپتالوں میں بھی کورونا وائرس مریضوں کی تعداد میں اضافہ ہوا۔
