آئل اینڈ گیس ریگولیٹری اتھارٹی (اوگرا) نے بجلی کمپنیوں، سی این جی اور دیگرصنعتوں کیلیے گیس مہنگی جبکہ گھریلو صارفین، تندوروں، کمرشل سیکٹر اور سیمنٹ انڈسٹری کیلئے قیمتیں برقرار رکھی ہیں۔
اوگرا کی جانب سے جاری کردہ نوٹیفکیشن کے مطابق سی این جی سیکٹر کیلئے گیس 88 روپے فی ایم ایم بی ٹی یو تک مہنگی جبکہ جنرل انڈسٹریل کیلئے کی قیمت میں 33 روپے فی ایم ایم بی ٹی یو اضافہ کر دیا گیا ہے۔
برآمدی شعبوں کے لیے گیس 66 روپے فی ایم ایم بی ٹی یو تک مہنگی کی گئی ہے۔ برآمدی شعبہ جنرل انڈسٹری کے لیے گیس 33 روپے فی ایم ایم بی ٹو جبکہ برآمدی شعبہ کیپٹو پاور کے لیے 66 روپے فی ایم ایم بی ٹو یو اضافہ کیا گیا ہے۔
اوگرا کے نوٹی فکیشن کے مطابق سی این جی ریجن ون کے لیے گیس 88 روپے فی ایم ایم بی ٹی اور ریجن ٹو کے لیے 67 روپے فی ایم ایم بی ٹی یو مہنگی کی گئی ہے۔ علاوہ ازیں فرٹیلائزر سیکٹر کے لیے گیس کی قیمت میں دو روپے فی ایم ایم بی ٹی یو اضافہ کر دیا گیا ہے۔
اسی طرح پاور اسٹیشنشز کے لیے گیس 33 روپے فی ایم ایم بی ٹی یو مہنگی کی گئی ہے۔ پاور اسٹیشنز کے لیےگیس کے کم سے کم چارجز میں 518 روپے فی ایم ایم بی ٹی یو اضافہ کیا گیا ہے جبکہ آئی پی پیز کے لیے بھی گیس 33 روپے فی ایم ایم بی ٹی یو مہنگی کر دی گئی ہے۔
