انٹرنیشنل اسلامک یونیورسٹی کے مختلف شعبوں میں کورونا کیسز سامنے آئے ہیں جس کے بعد جامعہ کو بند کرنے کا فیصلہ کیا گیا ہے۔
ریکٹر یونیورسٹی کا کہنا ہے کہ کورونا کیسز کے پیش جامعہ کو 29 اکتوبر تک بند رکھا جائے گا۔
ڈی ایچ او ضعیم ضیا نے بتایا کہ یونیورسٹی میں 2 کیسز رپورٹ ہوئے ہیں اور متعلقہ ڈیپارٹمنٹس کو سیل کیے جانے کا امکان ہے۔
گزشتہ روز قائد اعظم یونیورسٹی میں بھی کورونا کیسز رپورٹ ہوئے تھے جس کے بعد اسے 6 نومبر تک سیل کر دیا گیا تھا۔
نوٹیفکیشن کے مطابق 6 نومبر تک طلبا کی کلاسز آن لائن ہوں گی۔ 5 کورونا کیسز مثبت آنے پر یونیورسٹی کو سیل کیا گیا۔
ہاسٹلز میں موجود طلبا کو ہاسٹلز خالی کرنے کی ہدایت بھی کر دی گئی۔ دور دراز سے آئے طلبا شعبہ جات کے سربراہ سے اجازت لے کر ہاسٹلز میں رہ سکتے ہیں۔
اس سے پہلے وفاقی دارالحکومت اسلام آباد میں کورونا کیسز سامنے آنے کے بعد مزید تین نجی تعلیمی اداروں سیل کر دیا گیا تھا۔
اس سے پہلے 46 تعلیمی اداروں کو کورونا کیسز رپورٹ ہونے پر سیل کیا جا چکا ہے جبکہ 17 تعلیمی اداروں کو بند کرنے کے بعد کھولا جا چکا ہے۔
