بلوچستان نیشنل پارٹی (بی این پی) مینگل کے سربراہ سردار اختر مینگل کا کہنا ہے کہ حکومت کے خلاف صرف جلسوں سے کام نہیں چلے گا، کچھ دم دما مست قلندر کرنا پڑے گا۔
لاہور میں لیگی رہنما مریم نواز سے ملاقات کے بعد میڈیا سے گفتگو کرتے ہوئے اختر مینگل کا کہنا تھا کہ حکومت اپنا کوئی وعدہ پورا نہیں کر سکی۔
ان کا کہنا تھا کہ ہم حکومت کے ساتھ قدم سے قدم ملا کر چلنا چاہتے تھے لیکن حکومت رینگ رہی تھی۔
ان کا کہنا تھا کہ ہم نے عمران خان کو مسند پر بٹھایا لیکن انہوں نے ہمارے مطالبات پورے نہیں کیا۔
اختر مینگل کا کہنا تھا کہ ہمارے چھے نکات میٹرو بس سے زیادہ مشکل نہیں تھے، اگر عمران خان حکومت ہمارے مطالبات تسلیم نہیں کرسکتی تھی تو ہمیں پہلے بتا دیتی۔
ان کا کہنا تھا کہ ہم نے ہمیشہ جمہوریت کا علم تھامے رکھا ، اب ہمارے جلسوں کا سلسلہ جاری رہے گا۔
ان کا کہنا تھا کہ عمران خان کی حکومت کو کندھوں پر اٹھانا اب ہماری ذمہ داری نہیں ہے۔
صحافیوں سے بات کرتے ہوئے ان کا کہنا تھا کہ نواز شریف نے ہمارے بیانیے کو اپنایا ہے۔
اختر مینگل نے جاتی عمرہ میں مریم نواز سے ملاقات کی اور ملکی سیاسی صورتحال پر بات چیت کی۔
ملاقات کےدوران انہوں نے بلوچستان جلسے میں شرکت کرنے پر مریم نواز کا شکریہ ادا کیا۔
اختر مینگل نے پشاور دھماکے کی مذمت کرتے ہوئے کہا کہ یہ حکومت کی ناکامی ہے۔
ان کا کہنا تھا کہ بھارت سمیت کوئی بھی اس واقعے میں ملوث ہو اس کی ذمہ دار صرف حکومت ہے۔
