چین کمپنی رئیل می کا کہنا ہے کہ وہ سستے فائیو جی موبائل فون بنانے کی منصوبہ بندی کر رہی ہے۔
نکی ایشیا کو انٹرویو دیتے ہوئے کمپنی کے سی ای او سکائی لی نے کہا ہے کہ وہ یورپ سمیت دیگر ابھرتی ہوئی مارکیٹس میں یہ کم قیمت موبائل فون فروخت کرے گی۔
اس وقت رئیل می چین میں سستے ترین فائیو جی موبائل فون فروخت کر رہی ہے، اب وہ ملک سے باہر مارکیٹس کے لیے یہ موبائل فون فروخت کرے گی جن کی قیمت 350 ڈالرز (56 ہزار روپے) تک ہو گی۔
رئیل می کا یہ فون آئی فون 12 کی قیمت سے آدھا جبکہ ہوائی کے تازہ ترین فائیوجی موبائل میٹ 40 کی قیمت سے ایک تہائی سستا ہے۔
سکائی لی نے 2 برس قبل اس کمپنی کی بنیاد رکھی تھی، اس سے قبل وہ اوپو میں سینئر ایگزیکٹو کے عہدے پر کام کر رہے تھے، مختصر عرصے میں ان کی کمپنی موبائل فون مارکیٹس میں فروخت کے لحاظ سے سونی اور ایل جی کو پیچھے چھوڑتے ہوئے 7ویں نمبر پر آ گئی ہے۔
رواں برس بھارت کی دنیا کی سب سے بڑی سمارٹ فون کی مارکیٹ میں فروخت کے حوالے سے یہ چوتھے نمبر پر ہے۔ زیامی بھارت میں سب سے مقبول کمپنی ہے جبکہ ویو دوسرے اور سام سنگ تیسرے نمبر ہے۔
یورپ میں ہوائی پر پابندیوں کے باعث اب دیگر چینی کمپنیاں اس براعظم میں قدم جمانے کی کوشش کر رہی ہیں، ان میں زیامی، اوپو، ویوو اور ریئل می شامل ہیں۔
رئیل می کے سی ای او کا کہنا ہے کہ ان کی کمپنی اگلے برس بھی چینی مارکیٹ میں ان موبائل فونز کو فروخت کرے گی جن میں صرف فائیو جی موجود ہے کیونکہ دیگر ممالک میں ابھی یہ نیٹ ورک تشکیل کے مختلف مراحل میں ہے۔
البتہ ان کا کہنا تھا کہ وہ اگلے برس اپنے ان نئے موبائل فون کا 50 فیصد حصہ یورپ میں فروخت کرنے کا ارادہ رکھتے ہیں جن میں دیگر نیٹ ورکس کے ساتھ ساتھ فائیو جی کی سہولت بھی موجود ہوگی۔
رئیل می واحد کمپنی ہے جو چین میں صرف فائیو جی پر چلنے والے کم قیمت موبائل فروخت کر رہی ہے جن کی قیمت 148 ڈالرز (24 ہزار روپے) ہے جو اس وقت مارکیٹ میں اس قسم کے سستے ترین موبائل فون ہیں۔
