سوشل میڈیا اسٹار کی مرسڈیز گاڑی کو نذر آتش کرنے کی ویڈیو وائرل ہو گئی

 روسی وی لاگر میخائل لیٹون نے گاڑی کے بار بار خراب ہونے اور ورکشاپ جا کر تنگ ہونے کے بعد گاڑی کو جلانے کا فیصلہ کیا۔

میخائل لیٹون نے اپنی بیش قیمت گاڑی جلانے کا ایک وی لاگ یوٹیوب پر اپلوڈ کیا جسے اب تک کروڑوں لوگ دیکھ چکے ہیں۔

 ان کا کہنا ہے کہ انہوں نے گزشتہ سال ایک لاکھ 70 ہزار ڈالرز( کروڑ 72 لاکھ روپے) میں مرسڈیز اے ایم جی، جی 63 خریدی تھی لیکن وہ گاڑی کی کارکردگی سے مطمئن نہیں تھے۔

ان کے بقول انہوں نے یہ گاڑی محض 15 ہزار کلو میٹر چلائی تھی جس کے بعد گاڑی خراب ہونے لگی تھی، اس دوران گاڑی کئی بار ورکشاپ آتی جاتی رہی، یوں میخائل لیٹون گاڑی کی بار بار مرمت سے تنگ آ چکے تھے۔

میخائل لیٹون کار خریدنے کے بعد 4 مرتبہ مرسڈیز کے ورکشاپ پرگئے لیکن ان کی گاڑی کی تسلی بخش مرمت نہیں ہو سکی، چوتھی مرتبہ کمپنی کے مجاز ورکشاپ نے کار کی مرمت کرنے سے انکار کر دیا۔

 وہ گاڑی لے کر اپنے دوست کے پاس پہنچے جو مرسڈیز کاماہر تھا اس نے بتایا کہ گاڑی کے بعض پرزے اصل نہیں اور کسی عام  مارکیٹ سے خریدے ہوئے پارٹس سے تبدیل کر دیئے گئے ہیں۔

یہ جاننے کے بعد ان کا غصہ آخری حد کو پہنچ گیا اور انہوں نے اپنی بیش قیمت گاڑی کو ڈرامائی انداز میں خیر باد کہنے کا فیصلہ کر لیا۔

میخائل لیٹون اپنی گاڑی کو ایک سنسان جگہ پر لے گئے اور گاڑی پر ایندھن چھڑک کر اسے پھسم کر دیا۔

انہوں نے اس پورے منظر کو ڈرون اور دیگر کیمروں کے ذریعے فلم بند کیا، بعد ازاں جسے یوٹیوب پر اپلوڈ کر دیا گیا۔