معروف میسجنگ ایپ نے اپنے کاروباری صارفین کو دی گئی بعض سہولیات سے فائدہ اٹھانے کے عوض قیمت وصول کرنے کا اعلان کر دیا ہے۔
واٹس ایپ کی جانب سے جاری بیان میں بتایا گیا ہے کہ کمپنی کی جانب سے صارفین سے قیمت وصول کرنے کا مقصد ایپلی کیشن کا کاروبار مزید بڑھانا ہے۔
واٹس ایپ کے مطابق وصول کی گئی قیمت سے تقریباً دو ارب صارفین کے لیے اینڈ ٹو اینڈ انکرپٹڈ کالز اور میسجز کے فیچر کو مزید وسیع کیا جائے گا۔
واٹس ایپ کے ترجمان کا کہنا ہے کہ ہم نے ہر طرح کے کاروبار کو وسعت دینے کے لیے واٹس ایپ بزنس ایپلی کیشن متعارف کرائی ہے۔
ترجمان کا کہنا ہے کہ ہم کاروباری افراد اور صارفین کے درمیان موثر رابطے کے لیے ہر ممکن اقدامات کرتے ہیں۔
واٹس ایپ نے بتایا کہ کورونا کے اس دور میں کاروبار کو پھیلانے کے لیے محفوظ اور تیز ترین ذرائع کی ضرورت ہے۔
واٹس ایپ کے مطابق روزانہ تقریبا 175 ملین افراد واٹس ایپ کے بزنس اکاونٹس پر پیغامات بھیجتے ہیں۔
کمپنی کا کہنا ہے کہ صارفین آئندہ بھی اپنے دوستوں اور پیاروں کو پیغامات بھیجنے کے لیے واٹس ایپ استعمال کریں گے اسی لیے کمپنی نے اپنے صارفین کی رازداری پالیسی کو مزید محفوظ کرنے کے لیے اقدامات اٹھانے کا فیصلہ کیا ہے۔
یاد رہے پیغام رسانی کی معروف ایپلی کیشن کے ایکٹو صارفین کی تعداد 45 کروڑ سے تجاوز کر گئی ہے۔
سماجی رابطوں کے لیے استعمال کی جانے والی ویب سائٹ فیس بک نے 2014 میں واٹس ایپ کو 19 ارب ڈالر کے عوض خریدا تھا۔
