جمیعت علمائے اسلام (ف) کے اہم رہنما حافظ حسین احمد نے سابق وزیراعظم نوازشریف کو آستین کا سانپ قرار دے دیا۔
92 نیوز کے پروگرام میں بات کرتے ہوئے حافظ حسین احمد نے کہا کہ نوازشریف کو پہلا سیاسی فیڈر جنرل (ر) جیلانی نے پلایا اور ان کے روحانی باپ جنرل ضیاالحق تھے۔
انہوں نے کہا کہ جب آپ اس قسم کے لوگوں کو پالتے ہیں، آستین کے سانپوں کو پالتے ہیں تو پھر آپ کو بھی ایسی باتوں کے لیے تیار رہنا ہو گا۔
حافظ حسین احمد نے مزید کہا کہ الطاف حسین بھی لندن بیٹھا ہے، اسے بنانے والے بھی چند طالع آزما جرنیل تھے۔
پروگرام اینکر سعدیہ افضال نے جب ان سے پوچھا کہ آپ نوازشریف کو آستین کا سانپ کہہ رہے ہیں؟ تو انہوں نے جواب دیا کہ میں اس ملک کا باسی ہوں، یہ ملک ہے تو ہم ہیں۔
جے یو آئی (ف) کے رہنما کا کہنا تھا کہ ہر چیز کی ایک ریڈ لائن ہوتی ہے، ماضی میں نوازشریف لندن میں بیٹھے تھے، انہوں نے مختلف سیاسی جماعتوں کے رہنماؤں کو وہاں بلایا۔
انہوں نے کہا کہ نواز شریف نے سب سے انتخابات کا بائیکاٹ کرایا اور بعد میں خود اس میں حصہ لے لیا۔
