امریکی صدر ڈونلڈ ٹرمپ کی شکست کے آثار نمایاں ہونے لگے ہیں، کورونا وائرس سے نمٹنے میں ناکامی اور دیگر سیاسی غلطیوں کے باعث سروے کے نتائج ان کے خلاف جا رہے ہیں۔
اب ہارنے کے خوف سے انہوں نے انتخابات میں دھاندلی ہونے کا خدشہ ظاہر کر دیا ہے۔
پنسلوانیا میں انتخابی ریلی کے شرکاء سے خطاب کرتے ہوئے انہوں نے نتائج کی تاریخ بڑھانے پر مایوسی کا اظہار کیا ہے، ان کا کہنا ہے کہ دھاندلی 3 نومبر سے اس عرصے کے دوران ہوگی جو سپریم کورٹ دے گی۔
امریکی صدر نے کہا کہ کاش سپریم کورٹ مجھ سے اچھا برتاؤ کرتی، ری پبلکنز یقینی بنائیں کہ 3 نومبر کو ووٹ ڈالیں، ایک دوسرے کو پکڑ کر پولنگ بوتھ لے جائیں اور ماتحت اپنے افسر کو بھی لے کر ووٹ ڈلوائے۔
ڈونلڈ ٹرمپ نے ریلی کے شرکا سے خطاب کرتے ہوئے ڈیموکریٹس کو دلدل کے کیڑوں سے تشبیہ دی اور کہا کہ جو بائیڈن آئے تو کورونا ویکسین مزید التوا کا شکار ہو گی، پھر سے لاک ڈاؤن لگا دیا جائے گا۔
ان کا مزید کہنا تھا کہ آپ خوش قسمت ہیں میں آپ کا صدر ہوں، پنسلوانیا کا نتیجہ ری پبلکنز کے حق میں نکلا تو جیت یقینی ہو گی۔
واضح رہے کہ امریکی صدر ڈونلڈ ٹرمپ دوسری بار ری پبلکن پارٹی کی جانب سے صدارتی امیدوار ہیں، وہ 2016 میں ہلیری کلنٹن کو شکست دیکر صدر منتخب ہوئے تھے تاہم وہ اس وقت بھی ٹرمپ پاپولر ووٹ میں ہلیری کلنٹن سے پیچھے تھے۔
