بھارت کے سابق کرکٹر عرفان پٹھان بھی فلمی دنیا میں قدم رکھنے کے لیے تیار ہیں، وہ ایک تامل فلم سے اپنے فلمی کیرئیر کا آغاز کر رہے ہیں۔
بھارتی میڈیا رپورٹس کے مطابق عرفان پٹھان تامل فلم ‘کوبرا’ سے اپنے کیرئیر کا آغاز کریں گے جس میں وہ ایک انٹرپول ایجنٹ کا کردار ادا کریں گے۔
اس فلم میں جنوبی بھارت کی فلم انڈسٹری کے معروف اداکار وکرم مرکزی کردار ادا کریں گے، فلم کی ریلیز اگلے برس متوقع ہے
سابق بھارتی کرکٹر کی 36 ویں سالگرہ کے موقع پر فلم ’کوبرا‘ میں ان کے کردار کی پہلی جھلک جاری کی گئی تھی جس کے بعد مداحوں کو ان کی فلم کا بے صبری سے انتظار ہے۔
عرفان پٹھان کا اس حوالے سے کہنا ہے کہ کرکٹ کے بعد ان کی دوسری دلچسپی فلم ہے۔
کوربا فلم کے ڈائرکٹر اجے نے عرفان پٹھان کو ان کی سالگرہ کے موقع پر مبارکباد دیتے ہوئے ٹویٹ میں فلم کی جھلک بھی شیئر کی تھی۔ اس پوسٹر میں سابق کرکٹر ایک فرانسیسی انٹرپول افسر کے طور پر دکھائے گئے، انہوں نے کالا لباس پہنا ہوا تھا اور ان کے ہاتھ میں ایک گن تھی۔
عرفان پٹھان سے قبل سچن ٹنڈولکر، ویرات کوہلی اور یوراج سنگھ بھی فلم میں اداکاری کے جوہر دکھا چکے ہیں۔
