لمحوں میں کار سے جہاز میں تبدیل ہونے والی اڑن گاڑی

سلواکیہ کے ایئرپورٹ پر ایک ایسی کار کا کامیاب تجربہ کیا گیا ہے جو صرف 3 منٹ میں کار سے جہاز میں تبدیل ہو جاتی ہے، کمپنی کے مطابق یہ ایئر کار نہ صرف ہوا میں اڑان بھرنے کی صلاحیت رکھتی ہے بلکہ یہ زمین پر بھی چل سکتی ہے۔

کمپنی کا کہنا ہے کہ یہ ایئر کار آپ اپنے آفس، شاپنگ مال یا کہیں بھی لے جا سکتے ہیں لیکن اس کار کو چلانے کیلئے آپ کے پاس ڈرائیونگ کے ساتھ ساتھ پائیلٹ کا لائسنس بھی ہونا چاہئے۔

واضح رہے پرواز سے قبل اس ایئر کار کا پچھلا حصہ لمبا ہو جاتا ہے، دائیں اور بائیں بازو سیدھے ہو جاتے ہیں، اس کار میں بیٹھنے کیلئے دو نشستیں رکھی گئی ہیں جبکہ یہ کار مجموعی طور پر 15 سو فٹ کی بلندی تک جا سکتی ہے۔

معروف کار ساز پروفیسر اسٹیفن کا کہنا ہے کہ گاڑیاں اپنی ساخت اور انجن کے اعتبار سے وزنی ہوتی ہیں جبکہ طیارے بہت ہلکے ہوتے ہیں تاہم اس کار کا وزن تقریباً 11 سو کلو گرام ہے جبکہ یہ اضافی طورپر 199 کلو گرام وزن بھی لے جا سکتی ہے۔

اس کار کو بی ایم ڈبلیو کے 6۔1 انجن کے ساتھ 985 فٹ طویل رن وے درکار ہوتا ہے اور 124 میل فی گھنٹہ کی رفتار سے 620 میل کا سفر طے کر سکتی ہے۔

بوئنگ سے وابستہ سابق ڈاکٹر برانکو کا کہنا ہے کہ جس طرح کار سے بازو برآمد ہوتے ہیں اور دم کا حصہ وسیع ہوتا ہے یہ ایک بہترین اختراع ہے۔

واضح رہے اس ہوائی کار کی ویڈیو سوشل میڈیا پر وائرل ہو رہی ہے جس میں ہوائی کارکو پرواز کرتے ہوئے دیکھا جا سکتا ہے۔

کپمنی کا کہنا ہے کہ اگلے مرحلے میں اس اڑن گاڑی میں مزید طاقتور انجن لگایا جائے گا تاہم اس کی قیمت کے حوالے سے کوئی اعلان نہیں کیا گیا ہے۔

 اڑن کار بنانے والے انجنیئرز کا خیال ہے کہ یہ کار خاص افراد کو براہ راست ایئر پورٹ لے جانے اور دیگر آفات میں مدد گار ثابت ہو سکتی ہے۔