معروف میسجنگ ایپلی کیشن واٹس ایپ اپنے صارفین کے لیے نت نئے فیچرز متعارف کراتی رہتی ہے تاکہ صارفین کی ایپلی کیشن میں دلچسپی برقرار رہے۔
واٹس ایپ کے مطابق کمپنی نے اپنے صارفین کے لیے ایک نیا فیچر متعارف کرایا ہے جس کو آن کرنے سے صارفین کی چیٹ ہسٹری 7 دن بعد خودبخود ڈیلیٹ ہو جائے گی۔
واٹس ایپ کے مطابق پیغامات کو غائب کرنے والا یہ فیچر پیغام بھیجنے والے اور موصول کرنے والے کے پیغامات کو خود ہی ڈیلیٹ کر دے گا۔
فیس بک کی ملکیتی ایپلی کیشن نے کہا ہے کہ فیچر کو استعمال کرنے سے صارفین کی پرائیویسی پر کوئی فرق نہیں پڑے گا۔
کمپنی کا کہنا ہے کہ صارفین اگر اپنی گفتگو کو محفوظ رکھنا چاہتے ہیں تو وہ اسکرین شارٹس لے سکتے ہیں۔
واٹس ایپ نے نومبر کے آخر تک فیچر واٹس ایپ سیٹنگز میں بھیجنے کا اعلان کیا ہے۔
کمپنی کی جانب سے لکھے گئے بلاگ میں کہا گیا ہے کہ یہ فیچر صارفین کو ذہنی طور پر پرسکون رکھے گا، وہ اس بات پر یقین رکھیں گے کہ ان کی گفتگو ہمیشہ ایپ میں نہیں رہے گی۔
واٹس ایپ کی حریف ایپلی کیشن سنیپ چیٹ اسی طرح کے غائب ہوجانے والے پیغامات کی بنیاد پر بنائی گئی تھی۔
یاد رہے دنیا بھر میں دو بلین صارفین رکھنے والی واٹس ایپ اس وقت سماجی رابطوں کی اہم ایپلی کیشن بن چکی ہے جسے کاروباری مقاصد سمیت مختلف قسم کی پیغام رسانی کے لیے استعمال کیا جارہا ہے۔
حال ہی میں واٹس ایپ نے کاروباری اکاؤنٹس رکھنے والے افراد سے اس کی قیمت وصول کرنے کا اعلان کیا تھا۔
واٹس ایپ کا کہنا تھا کہ آئندہ سے کاروباری اکاونٹس رکھنے والے صارفین کو اپنے کاروباری معاملے کے لیے چارجز ادا کرنے ہوں گے۔
کمپنی نے کہا تھا کہ واٹس ایپ ان رقوم کو آڈیو اور ویڈیو کالنگ کو بہتر بنانے کے لیے خرچ کرے گا۔
