بھارتی ٹینس اسٹار اور قومی کرکٹر شعیب ملک کی اہلیہ ثانیہ مرزا پاکستان سپر لیگ (پی ایس ایل) میں شعیب ملک کی حوصلہ افزائی کیلئے پاکستان پہنچ گئی ہیں۔
کورونا وائرس کے باعث 17 مارچ 2020 کو پی ایس ایل کو معطل کر دیا گیا تھا جسے اب 8 ماہ بعد دوبارہ شروع کیا جا رہا ہے۔
یاد رہے پاکستان سپر لیگ کے پلے آف اور فائنل کراچی میں 14، 15 اور 17 نومبر کو ہوں گے جس کیلئے ملکی اور غیر ملکی کھلاڑی کراچی پہنچنا شروع ہو گئے ہیں۔
قومی ٹیم کے سابق کپتان اور مایہ ناز آل راؤنڈر شعیب ملک پی ایس ایل 2020 میں پشاور زلمی کی نمائندگی کر رہے ہیں۔
شعیب ملک گزشتہ ماہ ہی قومی ٹی ٹوئنٹی کپ کے دوران ٹی ٹوئنٹی کرکٹ میں 10 ہزار رنز بنا کر یہ سنگ میل عبور کرنے والے پہلے پاکستانی اور دنیا کے تیسرے بلے باز بن گئے ہیں۔
پی ایس ایل کے پلے آف اور فائنل میچز کیلئے پاکستان پہنچنے والے غیر ملکی کھلاڑیوں میں لاہور قلندر میں شامل انگلینڈ کے سمت پٹیل جمعہ کو ہی کراچی پہنچ چکے تھے۔
ویسٹ انڈیز کے کارلوس بریتھ ویٹ ہفتہ کو کراچی پہنچے ہیں، وہ پشاور زلمی کی نمائندگی کریں گے۔
اسی طرح کیمرون ڈیلپوٹ اور چیڈوک والٹن سمیت دیگر غیر ملکی کھلاڑی اتوار کو پاکستان پہنچے ہیں۔
