متحدہ عرب امارات پاکستانی سینیٹرز کیلئے سرمایہ کاری کا نیا مرکز بن گیا
سوئٹرز لینڈ کے بعد متحدہ عرب امارات پاکستانی سینیٹرز کیلئے سرمایہ کاریہ کا نیا اور پسندیدہ مقام بن گیا ہے، ایک درجن کے قریب غیر ملکی اثاثوں کے مالک پاکستانی سینیٹرز نے خلیجی ممالک میں سرمایہ کاری کر رکھی ہے۔
ڈان کی رپورٹ کے مطابق قبائلی اضلاع سے تعلق رکھنے والے تاج محمد آفریدی امیر ترین سینیٹر ہیں، جن کے اثاثے 2 ارب 22 کروڑ کے برابر ہیں جو اعظم سواتی کے اثاثوں سے تھوڑے زائد ہیں۔
الیکشن کمیشن کی طرف سے سال 2019 کے اثاثہ جات و واجبات سے متعلق اعداد وشمار کے مطابق تاج محمد آفریدی کے زرعی اور غیر زرعی اثاثوں کی مالیت ایک ارب 17 کروڑ روپے ہے جس میں سے 16 کروڑ 71 لاکھ 10 ہزار روپے کے اثاثے پاکستان سے باہر یو اے ای میں ہیں۔
پاکستان تحریک انصاف سے تعلق رکھنے والے سینیٹر اعظم سواتی کے مجموعی اثاثوں کی مالیت ایک ارب 20 کروڑ روپے ہے جس میں سے ان کی امریکہ اور یو اے ای میں 70 کروڑ 19 لاکھ 20 ہزار روپے کی 10 جائیدادیں اور ساڑھے 47 کروڑ روپے کی سرمایہ کاری بھی ہے۔
پی ٹی آئی کے ہی ایک اور سینیٹرز محمد ایوب کا دبئی میں ایک گھر اور کاروبار ہے، ساتھ ہی انہوں نے برطانیہ میں بھی سرمایہ کاری کر رکھی ہے۔
سینیٹرز محمد ایوب کے گھر کی مالیت 10 لاکھ ڈالر جبکہ کاروبار 60 لاکھ درہم کا ہے اور برطانیہ میں کی گئی سرمایہ کاری 10 لاکھ پاؤنڈز کے برابر ہے۔
اسی طرح قبائلی اضلاع کے ہی ایک اور سینیٹر اورنگزیب خان کی بھی متحدہ عرب امارات میں املاک اور سرمایہ کاری ہے، پاکستان میں ان کی املاک کی تعداد ایک سال کے عرصے میں بڑھ کر 10 سے 13 ہو چکی ہے۔
پاکستان مسلم لیگ ن کی سینیٹر راحیلہ مگسی نے برطانیہ میں اپنا 4 کروڑ 40 ہزار پاؤنڈ کا فلیٹ فروخت کیا اور رقم پاکستان لے آئیں، ان کے پرانے اسٹیٹمنٹ کے مطابق 2018 میں ان کے پاس متحدہ عرب امارات میں ایک فلیٹ تھا جس کی مالیت ایک کروڑ 23 لاکھ روپے تھی۔
سینیٹر راحیلہ مگسی کی اب یو اے ای میں موجود جائیداد کی تعداد جمیرہ میں ایک جائیداد کے ساتھ دگنی ہو گئی ہے لیکن حیرت انگیز طور پر مالیت وہی ہے جو انہوں نے گزشتہ برس دبئی کے فلیٹ کی ظاہر کی تھی۔
سینیٹرشاہین خالد بٹ کی امریکی میں دو جائیدادیں ہیں، مسلم لیگ ن کی سینیٹر نزہت صادق نے امریکہ میں اپنے شریک حیات کے نام پر گھر ظاہر کر رکھا ہے، سابق وزیر داخلہ رحمن ملک کا برطانیہ میں گھر ہے جس کی مالیت 13 لاکھ پاؤنڈز ہے۔
اسی طرح مسلم لیگ ن کے سینیٹر مصدق ملک اور ان کی اہلیہ کی بحرین میں جائیدادیں ہیں، متحدہ قومی موومنٹ پاکستان کے سینیٹر بیرسٹر سیف کی دبئی میں جائیدادیں ہیں جبکہ پی پی پی کے مصطفیٰ کھوکھر کا برطانیہ میں ایک گھر میں ایک تہائی کا شیئر ہے۔
چیئرمین سینیٹ صادق سنجرانی، سینیٹر روبینہ خالد، سینیٹر چوہدری تنویر خان، شاہزیب درانی اور ایم کیو ایم پاکستان کے عتیق شیخ کی بیرونی ملک جائیدادیں ہیں۔
