سعودی عرب کا جی 20 کانفرنس سے قبل جیل میں قید خاتون ایکٹوسٹ کو رہا کرنے پر غور

سعودی عرب جی 20 کانفرنس کی میزبانی سے پہلے قید کی گئی خاتون ایکٹوسٹس کی سزا معاف کرنے کا ارادہ رکھتا ہے۔
برطانوی خبررساں ادارے دی گارڈین سے بات کرتے ہوئے سعودی سفیر خالد بن باندرا بن سلطان کا کہنا تھا کہ سعودی عدالتوں میں قصوروار ٹھہرائی گئی خواتین ڈرائیونگ کے حقوق کی وکالت کرنے علاوہ بھی کئی کاموں میں ملوث تھیں۔
انہوں نے بتایا کہ سعودی عرب کی وزارت خارجہ میں اس بات پر بحث چل رہی تھی کہ آیا اس اقدام سے ملک کو سیاسی سطح پر کتنا نقصان ہوا ہے۔
یاد رہے کہ 21 اور 22 نومبر کو ہونے والے جی 20 کے الاس سے قبل انسانی حقوق کے حوالے سے سعودی عرب کے سابقہ ریکارڈ پر تنقید کی جا رہی ہے جس میں سعودی عرب میں گرفتار کی گئی وہ خواتین بھی شامل ہیں جنہوں نے ڈرائیونگ کے حقوق کے لیے مہم چلائی تھی۔
جی 20 کے ہونے والے اجلاس کی ایک تھیم عورتوں کو بااختیار بنانا بھی ہے۔
یاد رہے 2018 میں ڈرائیونگ پر پابندی کی خلاف ورزی کرنے پر سعودی عرب میں حقوق انسانی کی ایک سرگرم کارکن لوجین الہذلول سمیت دس خواتین کو گرفتار کیا گیا تھا۔
سعودی خبررساں ادارے کے مطابق ان خواتین پر ڈرائیونگ کی پابندی کے ساتھ ساتھ اپنی سرگرمیوں میں غیر ملکی عناصر کے ساتھ مبینہ رابطوں جیسے الزامات شامل تھے۔
سعودی میڈیا کے مطابق ان خواتین پر بعض حساس سرکاری عہدوں پر افراد کی بھرتی اور ملک سے باہر جارحانہ عناصر کی مالی معاونت کرنے جیسے الزامات بھی لگائے گئے تھے۔
سعودی میڈیا نے بتایا تھا کہ ان خواتین نے 44 اے کی خلاف ورزی کی تھی جس کے تحت ملزمان پر دہشت گردی کا الزام بھی عائد ہو سکتا ہے۔
سعودی قانون کے مطابق ایسے مجرموں کو تین سے 20 برس قید کی سزا سنائی جا سکتی ہے۔
گزشتہ سال مارچ میں اقوام متحدہ کی حقوق انسانی کی کونسل میں سعودی عرب کے اس اقدام کو تنقید کا نشانہ بنایا گیا۔
36 ممالک کے مشترکہ بیان میں مطالبہ کیا گیاکہ ریاض لوین سمیت انسانی حقوق کے تمام کارکنان کو فوری آزاد کرے۔