وفاقی وزیر برائے سائنس اینڈ ٹیکنالوجی فواد چوہدری کا کہنا ہے کہ کورونا کی وجہ سے پہلے چیزیں چائنہ سے منگوائی تھیں لیکن اب ہم اس قابل ہو گئے ہیں کہ پوری دنیا کو اپنی چیزیں ایکسپورٹ کر سکیں۔
اسلام آباد میں سائنس کے عالمی دن سے متعلق تقریب سے خطاب کرتے ہوئے انہوں نے کہا کہ یہ بہت اہم دن ہے، ماضی کے مقابلے میں سائنس بہت ترقی کر چکی ہے اور ہماری روزمرہ زندگی کے ہر شعبے میں داخل ہو چکی ہے۔
انہوں نے بتایا کہ ہم نے بہت چلینجز کا مقابلہ کیا ہے اور اس وقت بھی کورونا کی وجہ سے مشکلات کا شکار ہیں۔
فواد چوہدری کا کہنا تھا کہ جب پہلا کرونا کا کیس سامنے آیا تو اس کا مقابلہ کرنے کے لیے ہم نے 5 ماہ تک چین سے اشیاء لیں لیکن اب اپنے ماسک، سنیٹائزر اور کورونا کی کٹس بنائی ہیں جنہیں پوری دنیا میں ایکسپورٹ کرنے کے قابل ہو چکے ہیں۔
انہوں نے کہا کہ بہت جلد فائیو جی ٹیکنالوجی سے انقلاب آئے گا جبکہ کورونا کی ویکسین ایک بہت بڑی تبدیلی ہے، مختلف کمپنیوں سے ویکسین کی بات چیت اس لیے کی جا رہی ہے تاکہ کسی ایک کی اجارہ داری قائم نہ ہو۔
فواد چوہدری کا کہنا تھا کہ دنیا کا مستقبل سائنس و ٹیکنالوجی کے فروغ سے ہی وابستہ ہے، اگر پاکستان کو آگے لیکر چلنا ہے تو سائنس و ٹیکنالوجی کے فروغ کے لیے دل سے کام کرنا ہوگا ۔
