پاکستان کے تین بڑے شہر کورونا کی دوسری لہر کی زد میں

اسلام آباد: نیشل کمانڈ اینڈ آپریشن سینٹر کی جانب سے جاری اعداد و شمار کے مطابق ملک کے چند بڑے شہروں میں کورونا کے مثبت کیسز میں تیزی میں اضافہ ہو رہا ہے۔
این سی او سی کے اعلامیے کے مطابق ملک کے تین بڑے شہروں میں کورونا کیسز مثبت آنے کی شرح 15 فیصد سے تجاوز کر گئی ہے۔
اعلامیے میں بتایا گیا ہے کہ فورم کے اجلاس کے دوران حالیہ دنوں میں کورونا کے مصدقہ کیسز میں اضافے پر تفصیلی بات چیت کی گئی ہے۔
این سی او سی کے مطابق ملک بھر میں کورونا کے کیسز مثبت آنے کی شرح 5.4 فیصد ہو گئی ہے۔
این سی او سی کی جانب سے کورونا کی صورتحال کے حوالے سے منقعد کیے گئے اجلاس میں تمام صوبوں کے سیکرٹریز کی طرف سے بریفنگ دی گئی۔
چیف سیکرٹریز نے فورم کو بڑے شہروں میں کورونا کے بڑھتے کیسز اور ان کے حوالے سے کیے جانے والے حکومتی اقدامات سے آگاہ کیا۔
این سی اوسی کو بتایا گیا کہ کورونا کے کیسز کو پھیلنے سے روکنے کے لیے ملک بھر میں چار ہزار 136 مائیکرو لاک ڈاون لگائے گئے ہیں۔
اعلامیے میں بتایا گیا کہ کورونا کی دوسری لہر کے دوران ٹیسٹ اور قرنطینہ کرنے کی پرانی حکمت عملی استعمال کی جا رہی ہے۔
اعلامیے کے مطابق اس دوران لگائی جانے والی مختلف پابندیوں کا اطلاق آئندہ سال 31 جنوری تک رہے گا۔
چیف سیکرٹریز کی جانب سے بتایا گیا کہ اسپتالوں میں گنجائش ختم ہونے جیسے مسائل سے نمٹنے کے لیے آکسیجن رکھنے والے دو ہزار811 بستر مہیا کیے گئے ہیں تاکہ ہنگامی صورتحال سے نمٹا جا سکے،
دوسرے جانب 13 ہزار آکسیجن سلینڈرز صوبوں اور وفاق کے ہیلتھ یونٹس کو دیے گئے ہیں۔
فورم نے صوبائی چیف سیکرٹریز کی جانب سے دی گئی بریفنگ کے بعد صوبائی حکومتوں کے فوری اور ضروری اقدامات کو سراہا ہے۔