بحرین پر لمبے عرصے تک حکومت کرنے والے شہزادہ خلیفہ بن سلمان الخلیفہ84 سال کی عمر میں انتقال کر گئے ہیں۔
بحرین کی خبررساں ایجنسی نے ان کے انتقال کی تصدیق کی ہے۔
میڈیا رپورٹس کے مطابق شہزادہ خلیفہ بن سلمان الخلیفہ امریکا کے میو کلینک میں زیرعلاج تھے۔
شہزادہ خلیفہ بن سلمان 1970 سے اب تک ملک کے وزیراعظم کے منصب پر فائز تھے انہوں نے بحرین کی آزادی سے دو سال قبل عہدے کا حلف لیا تھا۔
انہیں دنیا کے سب سے طویل عرصے تک وزیراعظم کے منصب پر فائز رہنے والا وزیر اعظم کا اعزاز حاصل ہے۔
شہزادہ خلیفہ بن سلمان بحرین کے موجودہ بادشاہ حمد بن عیسی آل خلیفہ کے چچا تھے۔
شہزادہ خلیفہ بن سلمان آل خلیفہ 24 نومبر 1935ء کو جسرہ، بحرین میں پیدا ہوئے۔
ان کے والد کا نام سلمان بن حمد الخلیفہ تھا جب کہ والدہ کا نام موزہ بنت حمد تھا۔
انہوں نے ابتدائی تعلیم بحریں میں منامہ ہائی اسکول اور رفاع پیلس اسکول سے حاصل کی۔
شہزادی خلیفہ بن سلمان 1956 سے 1957 تک ایوکیشن کونسل کے رکن رہے۔
انہیں بعد ازاں ایجوکیشن کونسل کے چیئرمین کی حیثیت سے تعینات کر دیا گیا تھا، انہوں نے 1957 سے 1960 تک اس عہدے پر اپنے فرائض سرانجام دیے۔
انہیں 1960 سے 1966 تک شعبہ خزانہ کے ڈائریکٹر کے طور پر بھرتی کیا گیا۔
انہوں نے بحرین کی مالیاتی کونسل، مشترکہ کمیٹی برائے مطالعہ اقتصادیات و مالیات، کمیٹی فار دی رجسٹر آف کامرس، انتظامی کونسل کے چیئرمین، بحرین کی مالیاتی ایجنسی، ریاستی کونسل کے صدر اور مجلس دفاع اعلیِ کے سربراہ کے طور پر بھی اپنے فرائض منصبی سرانجام دیے۔
ان کے بھائی امیر عیسیٰ بن سلمان آل خلیفہ نے 1971 میں انہیں بحرین کا وزیر اعظم مقرر کیا تھا۔
50 سال تک بحرین پر حکومت کرنے والے وزیراعظم انتقال کر گئے
