دورہ نیوزی لینڈ کے لیے پاکستانی اسکواڈ کا اعلان، سرفراز احمد کی ٹیم میں واپسی

لاہور: پاکستان کرکٹ بورڈ نے دورہ نیوزی لینڈ کے لیے 35 رکنی اسکواڈ کا اعلان کر دیا ہے، سابق کپتان سرفراز احمد کی ٹیم میں واپسی ہوگئی ہے۔
قومی کرکٹ ٹیم کے ہیڈ کوچ اور چیف سلیکٹر مصباح الحق نے لاہور میں پریس کانفرنس کے دوران گرین شرٹس کے اسکواڈ کا اعلان کیا۔
مصباح الحق نے میڈیا کو بتایا کہ قومی ٹیسٹ کی کپتانی بابر اعظم کو سونپی گئی ہے جب کہ محمد رضوان کو نائب کپتان مقرر کیا گیا ہے۔
انہوں نے بتایا کہ سرفراز احمد کو ٹیم میں شامل کر کے شعیب ملک، محمد عامر اور اسد شفیق کو ڈراپ کر دیا گیا ہے۔
مصباح الحق نے بتایا کہ 35 رکنی اسکواڈ میں چھ اوپنرز، 11 مڈل آرڈر بلے باز، تین وکٹ کیپر اور دس فاسٹ بالرز کو شامل کیا گیا ہے۔
اسکواڈ میں کپتان بابر اعظم بابر اعظم، نائب کپتان محمد رضوان، اظہر علی، عابد علی، حیدر علی، حارث سہیل، حسین طلعت اور افتخار احمد شامل ہیں۔
دیگر کھلاڑیوں میں خوشدل شاہ، محمد حیفظ، روحیل نذیر، فخر زمان، امام الحق، شاہین شاہ آفریدی، شاداب خان، دانش عزیز، فواد عالم، عبد اللہ شفیق، امام الحق، شان مسعود اور ذیشان ملک شامل ہیں۔
عثمان قادر، یاسر شاہ، ظفر گوہر، عماد بٹ، فہیم اشرف، حارث رؤف، محمد عباس، محمد حسنین اور محمد موسیٰ، نسیم شاہ، سہیل خان اور وہاب ریاض کو بھی اسکواڈ کا حصہ بنایا گیا ہے۔
بابر اعظم کی کپتانی اور کارکردگی سے متعلق کیے گئے سوال کا جواب دیتے ہوئےمصباح الحق نے بتایا کہ بابراعظم ہمارا اہم بلے باز ہے اور وہ ذمہ داری لے رہا ہے، دباؤ کی بجائے بابراعظم کی کارکردگی میں بہتری آئی ہے، امید ہے کہ بابر اعظم کی کارکردگی میں مزید بہتری آئے گی۔
اسد شفیق کو اسکواڈ میں شامل نا کیے جانے سے متعلق انہوں نے بتایا کہ کرکٹ کے دروازے سب کے لیے کھلے ہیں، اسد شفیق کم بیک کر سکتے ہیں۔