لاہور: پاکستان سپر لیگ کے چاروں سیزن میں پشاور زلمی کا حصہ رہنے والے ویسٹ انڈین کھلاڑی ڈیرن سیمی پی ایس ایل 5 کے پلے آف مرحلے سے باہر ہوگئے ہیں۔
پی سی بی کے مطابق ڈیرن سیمی سفر میں حائل رکاوٹوں کے باعث پی ایس ایل فائیو کے پلے آف مرحلے میں شرکت نہیں کر سکیں گے۔
رپورٹس کے مطابق جارح مزاج بلے باز صہیب مقصود کو ڈیرن سیمی کی جگہ پلے آف مرحلے میں کھلایا جائے گا۔
دوسری جانب نیوزی لینڈ کے مچل میکلنگھن بھی کورونا کی پابندیوں کے باعث پاکستان سفر نہیں کر سکیں گے۔ ان کی جگہ جنوبی افریقا کے فاسٹ بالر وین پارنل کو کراچی کنگز کے اسکواڈ کا حصہ بنایا گیا ہے۔
یاد رہے پاکستان سپر لیگ 5 کے ملتوی شدہ چار میچز رواں ماہ کراچی میں کھیلے جا رہے ہیں۔
پی ایس ایل فائیو کا پانچواں ایڈیشن رواں سال فروری میں منقعد کیا گیا تھا لیکن کورونا کی صورتحال کو مدنظر رکھتے ہوئے پی سی بی نے یہ ایونٹ 17 ماررچ کو ملتوی کر دیا تھا۔
میچ ملتوی ہوا تو ایونٹ کے چار میچز باقی تھے۔
پی سی بی کی جانب سے جاری شیڈول کے مطابق 14 نومبر کو کوالیفائر میچ میں ملتان سلطانز، کراچی کنگز کے خلاف میدان میں اتریں گے اور یہ میچ جیتنے والی ٹیم فائنل تک رسائی حاصل کر لے گی۔
اسی روز ہونے والے پہلے ایلیمنیٹر میں لاہور قلندرز کی ٹیم پشاور زلمی کے مقابل آئے گی۔
15 نومبر کو کوالیفائر میچ ہارنے والی ٹیم پہلا ایلیمنیٹر جیتنے والی ٹیم سے مقابلہ کرے گی جبکہ سیریز کا فائنل 17 نومبر کو کھیلا جائے گا۔
ڈیرن سیمی پی ایس ایل 5 کے پلے آف مرحلے سے باہر ہوگئے
