مصر کے جزیرہ نما سینائی میں فوجی ہیلی کاپٹر کے حادثے میں 9 افراد ہلاک ہو گئے ہیں جن میں امریکہ کے 6 فوجی بھی شامل ہیں۔
بین الاقوامی ذرائع کے مطابق یہ افراد کثیرالقومی امن فورس کا حصہ تھے اور اس علاقے میں روٹین کے مشن پر جا رہے تھے۔
تیران کے قریب گرنے والے یو ایچ 60 بلیک ہاک میں سوار افراد میں شامل ایک امریکی فوجی کو شدید زخمی حالت میں اسپتال منتقل کر دیا گیا ہے۔
ایک اسرائیلی افسر نے واشنگٹن پوسٹ کو بتایا ہے کہ حادثے سے دوچار ہونے والے امریکی فوجیوں کا تعلق یو ایس نیشنل گارڈزمین سے تھا۔
حادثے میں ہلاک ہونے والے دیگر افراد میں ایک اطالوی، ایک فرانسیسی اور ایک چیکوسلواکیہ سے تعلق رکھنے والا فوجی شامل تھا۔
یہ امن فورس اس جزیرہ نما کی دیکھ بھال کرتی ہے جو اسرائیل اور مصر کے درمیان 1979 میں ہونے والے امن معاہدے کے بعد قائم کیا گیا تھا۔
اسرائیلی اور مصری ذرائع کا کہنا ہے کہ زخمی امریکی فوجی کو مصری افواج نے ریسکیو کیا اور اسے اسرائیلی طیارے کے ذریعے اسرائیل پہنچا دیا گیا۔
ذرائع کا کہنا ہے کہ بظاہر یہ حادثہ تکنیکی خرابی کے باعث پیش آیا ہے اور کسی قسم کے حملے کے آثار نہیں ملے تاہم آئی سیس سے تعلق رکھنے والا ایک دہشت گرد گروہ اس علاقے میں فعال ہے۔
کثیر القومی مبصرفوج (ایم ایف او) اقوام متحدہ سے الگ ادارہ ہے اور اس کا ہیڈکوارٹر اٹلی کے دارالحکومت روم میں ہے، اس فورس کو مصر اور اسرائیل کے 1978 میں ہونے والے تاریخی کیمپ ڈیوڈ معاہدے کے تحت قائم کیا گیا تھا۔
