انسان سائنس اور ٹیکنالوجی میں جسقدر ترقی کرتا جا رہا ہے اسی قدر نت نئی ایجادات سامنے آ رہی ہیں جو عقل کو حیران کر دیتی ہیں۔
مصنوعی ذہانت اور روبوٹس جدید دور کے سب سے حیران کن شعبے ہیں جو زندگی کے ہر شعبے میں انسانوں کی جگہ تیزی سے کام سنبھالتے جا رہے ہیں۔
جنوبی کوریا کے ایک نیوز چینل ایم بی این نے نیوز اینکر متعارف کرائی ہے جو انسانوں سے غیرمعمولی مشابہت رکھنے والا ایک روبوٹ ہے اور جس میں مصنوعی ذہانت کے ذریعے ایک نئی جان ڈال دی گئی ہے۔
ایشیا ون نیوز ویب سائٹ کے مطابق ایم بی این نے’منی برین‘ کمپنی کے ساتھ مل کر یہ پراجیکٹ تیار کیا ہے، نیوز اینکر کا نام ’کِم جُو ہا‘ رکھا گیا ہے۔
بتایا گیا ہے کہ ایک منٹ میں ہزار الفاظ ادا کرنے والی یہ ٹیکنالوجی روبوٹ کو حقیقت کے بہت قریب بنا دیتی ہے۔
پہلے مرحلے میں مواد، ویڈیوز اور اور سب ٹائٹلز کو ترتیب دی جائے گی اور بعد ازاں اسے روبوٹ اینکر میں اپ لوڈ کر دیا جائے گا جو اسے اپنے منفرد انداز میں ناظرین کے سامنے پیش کر دے گی۔
ایم بی این چینل کے ایک ملازم کا کہنا ہے کہ اس طریقے سے خبروں کو جلد نشر کیا جا سکے گا اور اس سے وقت اور وسائل کی بچت ہو گی۔
